Bizmandu
www.bizmandu.com

भीड थाम्न नसकेर विराटनगरको भाटभटेनी खुलेको तीन घण्टामै बन्द, एक दिनमा डेढ करोडको कारोबार

भीड थाम्न नसकेर विराटनगरको भाटभटेनी  खुलेको तीन घण्टामै बन्द, एक दिनमा डेढ करोडको कारोबार


विराटनगर। विराटनगरमा वैशाख १ गतेदेखि सञ्चालनमा आएको भाटभटेनी सुपर मार्केटले दोस्रो दिन आइतबार १ करोड ४३ लाखको कारोबार गरेको छ ।


भाटभटेनीका सञ्चालक मीनबहादुर गुरुङका अनुसार सञ्चालनको पहिलो दिन भिड थाम्न नसकेर उद्घाटन गरेको ३ घण्टापछि नै सुपर मार्केट बन्द गर्नुपरेको हुँदा १ गते ८१ लाखको मात्र कारोबार भएको थियो । तर दोस्रो दिन भने कारोबार दिनभरि नै सुचारु हुँदा १ करोड ४३ लाखको विक्री भएको हो ।
४० करोडभन्दा बढीका एक लाख २५ हजारभन्दा बढी प्रकारका सामग्री रहेको दाबी गरिएको विराटनगरको सात तले भाटभटेनीमा वैशाख २ गते सबैभन्दा बढी कारोबार खाद्यान्न (ग्रोसरी आइटम)को भएको छ । 
 
ग्रोसरी डिपार्टमेन्टबाट ४२ लाखको विक्री भएको सञ्चालक गुरुङले बताए ।ग्रोसरीपछि तयारी कपडा (गार्मेन्ट) ४१ लाख ५० हजार, भान्साका सामग्री (किचनवेयर) १८ लाख, जुत्ताचप्पल (फुटवेयर)–बाट १६ लाख र इलेक्ट्रोनिक सामग्री १४ लाख बराबरको विक्री भएको उनले जानकारी दिए ।सुपर मार्केटले आइतबार ताजा तरकारी र फलफूलमात्र ६२ हजारको विक्री गरेको छ ।
 
त्यस्तै सारी र लेडिज कुर्तासुरुवाल ५ लाख, शृङ्गारप्रसाधन (कस्मेटिक)का सामग्री ३ लाख तथा मदिरा र सुर्तीजन्य पदार्थ १ लाख ५५ हजार मूल्यका विक्री गरिएको छ । विराटनगरमा भाटभटेनीको शाखा १५ औँ संस्करणका रूपमा सञ्चालनमा आएको हो । विराटनगरबाहेक राजधानीमा १० वटा तथा पोखरा, बुटवल, चितवन र धरानमा गरी भाटभटेनीका १४ सुपर मार्केट छन् ।
 
यसपछि भैरहवा र ललितपुरको सातदोबाटोमा सञ्चालनको तयारी गरिँदै छ ।सञ्चालक गुरुङले दोस्रो दिनको कारोबारबाट आफू उत्साहित भएको बताए।उनले विराटनगर सीमा क्षेत्रमा अवस्थित रहेको चर्चा गर्दै यहाँको व्यापारलाई अनधिकृत पैठारीले प्रभावित बनाएको दाबी गरे । उनले सीमा क्षेत्रमा हुने अवैध कारोबार र भन्सार विन्दुमा गरिने मालवस्तुको न्यून विजकीकरणलाई नियन्त्रण गर्न सरकार सक्रिय हुनुपर्ने आग्रह गरे ।