काठमाडौं। अर्थमन्त्री वर्षमान पुनले नीति तथा कार्यक्रम, वित्त नीति र मौद्रिक नीतिबीच तालमेल मिलाइने बताएका छन्।
उनले आगामी आर्थिक वर्षको बजेटबारे मंगलबार बैंक तथा वित्तिय क्षेत्रका प्रतिनिधिसँग सुझाव लिने क्रममा बजेट र मौद्रिक नीतिबीच तालमेल मिलाइने बताएका हुन्।
उनले तालमेलका लागि नेपाल राष्ट्र बैंकसँग छलफल भइरहेको बताए। ‘सरकार र नियामक भनेकै राज्य हो। राज्यको उद्देश्य र नीति एउटै हुन्छ’, उनले भने, ‘नीति कार्यक्रम, वित्त नीति र मौद्रिक नीतिमा सामञ्जस्यता कायम गरिन्छ।’
अर्थतन्त्र चलायमान हुने गरी बजेट ल्याउने उनको भनाइ छ। ‘आर्थिक नीतिभित्र बसेर निजी क्षेत्रलाई प्रवर्धन गर्ने, सहजीकरण गर्ने र मनोबल उठाउने गरी काम गर्ने हो’, उनले भने, ‘त्यसका लागि सरोकारवालाहरुबीचमा छलफल र परामर्श भइरहेको छ।’
उनले सूचना प्रविधि, ऊर्जा, पर्यटन, कृषि, ठूला र मझौला पूर्वाधारलाई प्राथमकिता दिएर बनेट ल्याउने बताए।
‘हाम्रो भू–अवस्थितिअनुसार सूचना प्रविधि क्षेत्रमा फोकस हुँदा त्यसबाट ठूलो संख्यामा रोजगारी सृजना हुने र लगानी आउने सम्भावना बढी हुन्छ भन्ने हामीलाई लागेको छ’, उनले भने, ‘बजेटमार्फत सूचना प्रविधि क्षेत्रलाई प्रवर्धन गर्ने सोच बनाएका छौं।’
मन्त्री पुनले निजी क्षेत्रलाई सरकारी निकायबाट निरुत्साहित तुल्याउने काम हुन नदिने पनि बताए। ‘राज्यका निकायले निजी क्षेत्रलाई तर्साउने र निरुत्साहित गर्ने काम गर्दैनन्,’ उनले भने, ‘सरकारले निजी क्षेत्रलाई प्रवर्धन र सहजीकरण गर्ने हो ।’
