काठमाडौं । काठमाडौंको दरबारमार्गबाट प्रहरीले स्रोत नखुलेको ९८ लाख रुपैयाँ फेला पारेको छ। रकमसहित प्रहरीले दुईजनालाई पक्राउसमेत गरेको छ।
काठमाडौं उपत्यका अपराधन अनुसन्धान कार्यालयको टोलीले स्रोत नखुलेको रकमसहित उनीहरुलाई पक्राउ गरेको हो। पक्राउ पर्नेमा मिलन विक र समीर सुनुवार रहेका छन्।
९८ लाख रुपैयाँसहित पक्राउ परेकाहरु हुन्डीको कारोबारमा संलग्न व्यक्ति भएको आशंका प्रहरीलाई छ। यो घटनाबारे प्रहरीले अनुसन्धान थालेको छ।
यस घटनाबारे प्रहरीले शुक्रबार बिहान साढे ११ बजे पत्रकार सम्मेलन गर्दै थप विवरण सार्वजनिक गर्ने तयारी गरेको छ।
