काठमाडौं। सरकारले प्रहरी नायव महानिरीक्षक उमेशराज जोशी र भिमप्रसाद ढकाललाई प्रहरी अतिरिक्त महानिरीक्षक (एआईजी)मा बढुवा गरेको छ।
बिहिबार बसेको मन्त्रिपरिषद् बैठकले जोशी र ढकाललाई एआईजीमा बढुवा गरेको हो। प्रहरीमा एआईजीको २ पद वैशाख पहिलो सातादेखि खालि थियो। एआईजी सन्दीप भण्डारीले वैशाख ५ र मिरा चौधरीले वैशाख ७ मा अवकाश पाएका थिए।
उनीहरुले अवकाश पाउनु केही दिनअघि जोशी र ढकाललाई बढुवा गर्न सिफारिस गरिएको थियो।
मन्त्रिपरिषद् बैठकले समाज कल्याण परिषद्को उपाध्यक्षमा सुनसरीका नन्दलाल माझी र भाषा आयोगको सदस्यमा काठमाडौंका सुरेश मानन्धरलाई नियुक्त गर्ने निर्णय गरेको सञ्चार तथा सूचना प्रविधिमन्त्री रेखा शर्माले जानकारी दिइन्।
