काठमाडौं। नेपाल विद्युत प्राधिकरण कुलेश्वर वितरण केन्द्र अन्तर्गतको विद्युतीय वितरण लाइन भूमिगत गर्ने कामका लगि उपत्यकाका विभिन्न स्थानमा आगामी आइतबारदेखि ५ दिनसम्म दैनिक ४/४ घण्टा बिजुली काटिने भएको छ।
प्राधिकरणको काठमाडौं उपत्यका पश्चिम वितरण प्रणाली सुदृढीकरण आयोजनाले शनिबार सूचना प्रकाशित गर्दै तालिका सार्वजनिक गरेको हो। विभिन्न फिडरअन्तर्गत बिहान ११ देखि दिउँसो ३ बजेसम्म विद्युत आपूर्ति बन्द हुने सूचनामा छ।
रिगमेन र कालीमाटी फिडरअन्तर्गत सोल्टीमोडदेखि रविभवनसम्मको क्षेत्रमा आइतबार विद्युत आपूर्ति बन्द हुनेछ। बलम्बु र थानकोट फीडरअन्तर्गत नैकापदेखि बलम्बुसम्मको क्षेत्रमा सोमबार र बिहीबार, कालीमाटी फिडरअन्तर्गत रविभवनदेखि कलंकी चोकसम्मको क्षेत्रमा मंगलबार लाइन जानेछ। यस्तै थानकोट र मातातीर्थ फिडरअन्तर्गत हाइभिजन कोलोनी क्षेत्रमा शुक्रबार लाइन जानेछ।
मौसम प्रतिकूल भएमा पूर्वनिर्धारित तालिकाअनुसार विद्युत आपूर्ति नरोकिने पनि सूचनामा छ।
