काठमाडौं। ओभर-लेको काम सकिएपछि सुर्खेत विमानस्थल २५ दिनपछि आंशिक रूपमा सञ्चालनमा आएको छ। मर्मत सम्भारको काम पूर्ण रुपमा नभएकाले जनवरी दोस्रो साताबाट मात्रै यो विमानस्थल पूर्ण रुपमा सञ्चालनमा आउनेछ।
'अहिले विहान ६:३० बजेदेखि दिउँसो १२ बजेसम्मका लागि विमानस्थल सञ्चालनमा ल्याइएको छ। ओभर-लेको काम सकिएको छ तर एप्रोनको काम बाँकी नै छ। जनवरी १० तारिखसम्म विमानस्थल मध्यान्ह १२ बजेपछि बन्द गरिनेछ,' विमानस्थलका एक कर्मचारीले भने।
मर्मत सम्भारका लागि यो विमानस्थल गत मंसिर १० देखि पुस ५ गते(हिजो) सम्म नियमित उडान बन्द गरिएको थियो।
विसं. २०२३ सालमा स्थापना भएको यो विमानस्थलको धावनमार्गको लम्बाई १२ सय ५५ मिटर छ भने चौडाइ ३० मिटर छ। यो विमानस्थलमा एटीआर-४२ सिरिजको जहाजले उडान-अवतरण गर्दै आएको छ।
सुर्खेत विमानस्थलमा हाल काठमाडौं-सुर्खेत निजी वायुसेवा कम्पनीले मात्र नियमित उडान गर्दै आएको छ।