सिमकोट (हुम्ला)। राष्ट्रिय सडक सञ्जालसँग नजोडिएको हिमाली जिल्ला हुम्लाको सदरमुकाम सिमकोटमा दुई वटा टिपर पुगेका छन्। नेपालगञ्ज, सुर्खेत हुँदै एक सातामा ती टिपर शुक्रबार सिमकोट आइपुगेका हुन्।
दक्षिण कर्णाली करिडोर भएर पहिलो पटक हुम्ला पुगेका टिपर र चालकलाई स्थानीयले फूलमालाले स्वागत गरेका छन्। उत्तरी नाम्खा गाउँपालिकाको च्याछरा भीर खण्डको सडक छिचोल्नका लागि आवश्यक १२ हजार डिजल ढुवानी गर्ने क्रममा ती टिपर यहाँ ल्याइएका हुन्।
नेपाली सेनाले निर्माण गरिरहेको सर्केगाड र खार्पुनाथ गाउँपालिकाको सीमा क्षेत्रमा पर्ने छारे भीर सडकखण्ड पार गरेर दुईवटा टिपर सिमकोट पुगेको जनाइएको छ। नाम्खाको च्याछरा भीर छिचोल्ने जिम्मा लिएको ओएसिस इन्जिनियर्स एन्ड बिल्डर्स प्रालिका प्रोपाइटर प्रेम कार्कीले सोही खण्डका लागि डिजलको आवश्यक परेपछि टिपर हुम्ला ल्याइएको बताए।
च्याछरा सडक निर्माणका लागि डिजेल नहुँदा काम रोकिएपछि जिल्ला प्रशासन र मन्त्रालयमा आग्रह गरेपछि छारे खण्डबाट नेपाली सेनाले उक्त सवारी गुड्नका लागि अनुमति दिएको हो। छारे भीरबाट ती सवारी चल्न नदिएपछि तीन दिन स्याल्तडी बसेर विभिन्न प्रक्रिया पूरा गरेपछि टिपरलाई यहाँ आउन अनुमति प्राप्त भएको प्रोपाइटर कार्कीले बताए।
टिपर खार्पुनाथ गाउँपालिकाको कर्णाली नदी पार गरेर आएका हुन्। नेपाली सेनाले छारे सडक खण्डबाट अन्य कुनै पनि सवारी साधन र मानिसलाई सोही सडकबाट आवतजावत गर्न दिएको छैन। उत्तरी नाम्खाको च्याछरा सडक छिचोल्न बाँकी रहेको १७ किलोमिटर सडकका लागि अझै ३० हजार डिजेल आवश्यक पर्ने उनले बताए।
च्याछरा सडकखण्ड आगामी असार १० गतेसम्म ठूला सवारीसाधन गुड्नसक्ने बनाउने लक्ष्य भए पनि आवश्यक ‘म्याट्रल’ नहुँदा ढिलाइ भएको हो। उक्त सडक खण्डलाई असारमा ठूला सवारी सामान्य आवतजावत गर्न सकिने गरी कात्तिकमा सम्पन्न गर्ने कार्कीले बताए। रासस