काठमाडौं। नेपाल उद्योग वाणिज्य महासंघका अध्यक्ष चन्द्रप्रसाद ढकाल र नेपालका लागि अन्तर्राष्ट्रिय वित्त निगम (आईएफसी) का प्रबन्धक मार्टिन होल्टम्यानबीच आर्थिक सुधारबारे छलफल भएको छ।
बिहिबार भएको भेटवार्तामा महासंघका अध्यक्ष ढकालले आर्थिक सुधारका लागि सरकार, विकास साझेदार र निजी क्षेत्रबीच सहकार्य बढाउन आवश्यक रहेको बताए।
उनले प्राकृतिक स्रोतसाधन, युवा र गतिशील जनशक्ति तथा रणनीतिक भौगोलिक अवस्थितिका कारण नेपालमा आर्थिक विकास गर्न सजिलो रहेको तर व्यावसायिक वातावरण सुधार गर्न आवश्यक रहेको बताए।
उनले नवप्रवर्तन, उद्यमशीलता विकास र दिगो आर्थिक वृद्धिको वातावरण सिर्जना गर्न आईएफसीसँग सहकार्यको आवश्यकता औंल्याएको महासंघले जनाएको छ।
आईएफसीका नेपाल, बंगलादेश र भुटानका लागि देशीय प्रबन्धक होल्टम्यानले आईएफसी सधैं निजी क्षेत्रलाई विकासको साझेदार बनाउनुपर्ने पक्षमा रहेको बताए।
