प्रिमियर लिगमा गएराति सम्पन्न खेलमा म्यानचेस्टर सिटीले ब्राइटोनलाई हराएको छ। फाल्मर स्टेडियममा सम्पन्न खेलमा सिटीले घरेलु टोलीमाथि ४-० गोलको सहज जित निकालेको हो।
खेलको १७ औँ मिनेटमै केभिन डी ब्रुइनाको गोलमा सिटीले अग्रता बनाएको थियो। दोस्रो र तेस्रो गोल फिल फोडेनले २६ र ३४ औँ मिनेटमा गरे। पहिलो हाफमा तीन गोलले अघि रहेको सिटीका लागि चौथो गोल जुलियन अल्भारेजले ६४ औँ मिनेटमा गरे।
सिटीको जितसँगै शीर्षस्थानको होड थप रोमाञ्चक बन्दै गएको छ।
शीर्षस्थानको आर्सनलले ३४ खेलबाट ७७ अंक बनाउँदा दोस्रो स्थानको सिटीले ३३ खेलबाट ७६ अंक बनाएको छ। यो होडमा बलियो दाबेदारी दिइरहेको लिभरपुर अघिल्लो खेलमा एभर्टनसँग स्तब्ध हुँदा प्रतिस्पर्धामा कमजोर देखिएको छ। यसको बावजुत ३४ खेलबाट ७४ अंक जोड्दै तालिकाको तेस्रो स्थानमा कायम छ।
सिटीसँग हार ब्यहोरेको ब्राइटोन भने ४४ अंक बनाएर तालिकाको ११ औँ स्थानमा छ।
