काठमाडौं। हेलिकोप्टर सेवा प्रदायक कम्पनी हेलि एभरेष्ट नेपाल नागरिक उड्डयन प्राधिकरण (क्यान) को मापदण्ड अनुसार जहाज विस्तारमा लागेको छ।
क्यानले हेलिकप्टर कम्पनीलाई पाँच वर्षभित्र जहाज संख्या ५ पुर्याउन निर्देशन दिएअनुसार हेलि एभरेष्टले संख्या थप्नतिर लागेको हो।
कम्पनीले फ्रान्सको एक कम्पनीसँग ए-एच १२५ सिरिजको एउटा हेलिकोप्टर खरिद गरेको छ। हेलिकोप्टरलाई ९ एन-एओबी कलसाइन दिइएको छ।
‘हामीले फ्रान्सको एउटा कम्पनीसँग एयरबसको ए-एच १२५ सिरिजको हेलिकोप्टर खरिद गरेका हौं। क्यानको मापदण्ड पूरा गर्ने उद्देश्यले हेलिकोप्टर थपेका हौं,’ कम्पनीका बजार प्रमुख सीताराम सापकोटाले भने, ‘व्यावसायिक योजना अनुसार सन् २०२५ भित्र अर्को हेलिकोप्टर किनेर ५ पुर्याउनेछौं।’ कम्पनीसँग यसअघि ३ हेलिकोप्टर थिए।