काठमाडौं। हाइड्रोलिक सिस्टममा समस्या आएर बिहिबार राती ग्राउण्डेड भएको नेपाल वायुसेवा निगमको वाइडबडी जहाज १२ घण्टामा मर्मत गरेर रिलिज गरिएको छ।
बिहिबार राती ११:०० बजे काठमाडौं-दोहा उडान गरेको आधा घण्टामै प्राविधिक समस्या आएर काठमाडौंमा अवतरण गराइएको निगमको ९ एन-एएलवाइ कलसाइनको जहाज मर्मत गरेर दिल्ली उडाउन लागिएको हो।
मर्मत गरेर रिलिज गरिएको जहाजले केहीबेरमा काठमाडौं-दिल्ली उडान गर्ने निगमका प्रवक्ता देवेन्द्र पुनले बताए।
‘हिजो राती हाइड्रोलिक सिस्टममा समस्या आएर जहाज फर्किएको थियो। जहाज मर्मत भएर अहिले उडानको तयारीमा छ,’ प्रवक्ता पुनले बिजमाण्डसँग भने।
अपराह्न १ बजे उडान गर्ने तालिका रहेकामा केही ढिलाइ भएको छ। त्रिभुवन विमानस्थल कार्यालयका अनुसार जहाज करिब २ बजे आसपास उड्ने छ।
अन्तर्राष्ट्रिय उडानका लागि निगमसँग दुईवटा ए-३२० र दुईवटा ए-३३० जहाज रहेकामा एउटा न्यारोबडी जहाज चार महिनादेखि ग्राउण्डेड छ।