काठमाडौं। सार्वजनिक खरिद अनुगमन कार्यालयले १९ निर्माण कम्पनीसँगै २२ वटा फर्मलाई कालोसूचीमा राखेको छ। ठेक्का लिएर निर्माणको काम नगर्नेदेखि कानुनी सेवा दिने, लुगाकपडा आपूर्ति गर्नेदेखि सूचनाप्रविधिको काम गर्नेसम्मका फर्म कारबाहीमा परेका हुन्।

एकदेखि तीन वर्षसम्म सार्वजनिक ठेक्कामा सहभागी हुन नपाउनेगरि कालोसूचीमा पर्नेमा १९ निर्माण कम्पनी, एक/एक वटा ल फर्म, फेसन वेयर सप्लायर्स र प्राविधिक फर्म छन्।  

विभिन्न कार्यालयहरुको सिफारिसमा कम्पनीहरुलाई सार्वजनिक खरिद कार्यालयले कारबाही गरेको हो।  कालोसूचीमा परेकाहरुले सार्वजनिक खरिद ऐन, २०६३ को दफा ६३ को उपदफा (१) बमोजिम तोकिएको अवधिसम्म सार्वजनिक निकायको कुनै पनि खरिद कारबाहीमा भाग लिन पाउदैनन्।

तीन वर्षका लागि कालोसूचीमा पर्नेमा आइएस कन्स्ट्रक्सन प्रालि दिपायल र अर्भली इन्फ्रापावर न्यु दिल्ली छन्। आइएसलाई कालोसूचीमा राख्न सुदूरपश्चिम प्रदेशको आन्तरिक मामिला तथा कानुन मन्त्रालयले लेखिपठाएको हो भने अर्भलीलाई कारबाही गर्न नेपाल विद्युत प्राधिकरणले सिफारिस गरेको हो।

यस्तै कालीगण्डकी करिडोरमा दुइटा ठेक्का पाएर सम्झौताअनुसार काम नगर्ने काठमाडौंको गणपति ग्रुप अफ कन्स्ट्रक्सन दुई वर्षका लागि कालोसूचीमा परेको छ। उक्त कम्पनीलाई कारबाहीका लागि सडक विभागको संघीय सडक सुपरिवेक्षण कार्यालय र जोमसोम कोरला सडक योजनाले सार्वजनिक खरिद अनुगमन कार्यालयमा सिफारिस गरेका हुन्।

१ वर्ष ६ महिनाका लागि कालोसूचीमा पर्नेमा सिन्धुलीको सुनकोशी गाउँपालिकाको सिफारिसमा सोही जिल्लाको सरस्वती निर्माण सेवा र सडक डिभिजन नेपालगञ्जको सिफारिसमा बाँकेको धिताल बिल्डर्स छ।

१ वर्ष ३ महिनाका लागि कालोसूचीमा परेकामा एकेज कन्स्ट्रक्सन चितवन, पञ्चपुरी कन्स्ट्रक्सन सुर्खेत, श्रीदेउती बज्यै निर्माण सेवा प्रालि बर्दिया, काठमाडौंका पुष्पाञ्जली कन्स्ट्रक्सन एण्ड सप्लायर्स प्रालि र  प्रनिश इन्टरनेशनल प्रालि छन्।

एक वर्षका लागि कालोसूचीमा परेकाहरुमा चितवनको बालाजी निर्माण सेवा, जुम्लाको मालिका कन्स्ट्रक्सन, लमजुङको चम्पावती रोडा ढुंगा बालुवा प्रशोधन केन्द्र प्रालि, ललितपुरको न्यु प्रिसियल फेसन वेयर, क्यापिटल इन्टरप्राइजेज ललितपुर, बाँकेको प्रसाद कन्स्ट्रक्सन, बराह निर्माण सेवा सुर्खेत, काठमाडौंको सत्यस्वरी कन्स्ट्रक्सन प्रालि, पशुपति कन्स्ट्रक्सन प्रालि, क्रिएटिभ बिजनेस इन्टरनेशनल, कोशी निर्माण सेवा काठमाडौ, जुडिसियल पाथ एन्ड लिगल सर्भिस प्रालि छन्।