काठमाडौं। कर्जाको ब्याजदर घट्न थालेको छ। पछिल्ला केही महिनायता बैंकहरूले निक्षेपको ब्याजदर निरन्तर घटाइरहेकाले बेसरेट कम भई कर्जाको ब्याजदर पनि घट्न थालेको हो।

निक्षेप निरन्तर थपिँदै गए पनि कर्जाको माग बढ्न नसक्दा बैंकहरू लागत घटाउनु पर्ने दबाबमा छन्। त्यसैले उनीहरूले बेस रेटमै समेत ऋण दिन थालेका छन्।

सञ्‍चालनमा रहेका २० वाणिज्य बैंकमध्ये स्टाण्डर्ड चार्टर्ड र राष्ट्रिय वाणिज्य बैंकको बेस रेट ८ प्रतिशतभन्दा कम छ। चैतमा राष्ट्रिय वाणिज्य बैंकको बेस रेट ७.६२ प्रतिशत र स्टाण्डर्ड चार्टर्ड बैंकको ७.५२ प्रतिशत छ।

१२ वटा बैंकको बेस रेट भने ९ प्रतिशतभन्दा माथि छ। सबैभन्दा बढी बेस रेट हुने बैंक हिमालयन हो। बैंकले बेस रेटलाई आधार बनाएर त्यसमा केही प्रतिशत प्रिमियम थप गरी कर्जा लगानी गर्छन्।

प्रणालीमा लगानीयोग्य रकम (तरलता) थुप्रिएका बेला कर्जाको माग नभएपछि बैंकहरूले निक्षेपको ब्याजदर निरन्तर घटाउँदै आएका छन्।

हाल मुद्दती निक्षेपको अधिकतम ब्याजदर ८ प्रतिशत तल छ। बचतको ब्याजदर ३ प्रतिशतमा झरिसकेको छ। सरकारी स्वामित्वको कृषि विकास बैंकले चैत १ गतेदेखि लागू हुने गरी मुद्दती निक्षेपको ब्याजदर ५.६६ प्रतिशतमा झारेको छ। जुन अन्य वाणिज्य बैंकहरूको तुलनामा सबैभन्दा कम हो।

वाणिज्य बैंकहरूको बेस रेटको अवस्था