काठमाडौं। पोखरास्थित पोखरा अल्ट्रालाइटले फागु पुर्णिमा लक्षित योजना सार्वजनिक गरेको छ। कम्पनीले आउँदो आइतबार अल्ट्रालाइट उडान सेवा लिने पर्यटकका लागि अधिकतम १५ प्रतिशतसम्म छुटको योजना सार्वजनिक गरेको हो।
कम्पनीले ३०, ६० र ९० मिनेटको उडान सेवामा लागू हुँदै आएको शुल्कमा क्रमशः १०, १३ र १५ प्रतिशत छुट योजना सार्वजनिक गरेको छ।
अल्ट्रालाइटअन्तर्गत सामान्यतया नेपाली पर्यटकका लागि १५, ३०, ६० र ९० मिनेटको प्याकेज दर क्रमश १७ हजार ६०० रुपैयाँ, २५ हजार ६०० रुपैयाँ, ३८ हजार ४०० रुपैयाँ र ५३ हजार १२० रुपैयाँ निर्धारण हुँदै आएको छ।
साहसिक पर्यटकीय गतिविधिअन्तर्गत रहेको पोखरा अल्ट्रालाइटमार्फत यात्रुले पोखरा सहर, माछापुच्छ्रे, कपुचे ताल, अन्नपूर्ण हिमश्रृङ्खलाको दृश्यावलोकन गर्न सक्छन्। पोखरा विमानस्थलबाट उडान र अवतरण हुने उडानमा पाइलट र यात्रु गरी २ जनाको मात्र सहभागिता हुन्छ। १०० किलोग्राम सम्म वजन भएका यात्रुले यो सेवा लिन सक्ने प्रावधान रहेको छ।
पोखरामा सन् १९९७ बाट अल्ट्रालाइट उडान सेवा सुरु भएको हो। आन्तरिक र वाह्य पर्यटकको विशेष रोजाइमा परेको यो सेवा दक्षिण एसियामै पहिलोपटक नेपालमा सुरु भएको हो।