कसलाई कति पर्यो हेर्न यहाँ क्लिक गर्नुस्
काठमाडौं । बरुण हाइड्रोपावर कम्पनी लिमिटेडले सर्वसाधारणका लागि जारी गरेको प्राथमिक सेयरको आज बाँडफाँड गरेको छ । कम्पनीले एक सय रुपैयाँ अंकित दरका चार लाख ८६ हजार कित्ता सेयर निस्कासन गरेको थियो ।
कुल सेयरमध्ये कम्पनीले २४ हजार तीन सय कित्ता सामूहिक लगानी कोषका लागि छुट्याएको थियो । नौ हजार ७२० कित्ता सेयर कर्मचारीले पाएका छन् । बाँकी चार लाख ५१ हजार ९८० कित्ता सेयरका लागि मात्र सर्वसाधारणले आवेदन दिएका थिए ।
आवेदन दिएका सेयरधनीहरुले वढीमा १० कित्ता सेयर मात्र पाएका छन् । कम्पनीको सेयर ४५ हजार एक सय ९८ जनाले मात्र पाएका छन् । बैंकले चार लाख ५१ हजार ९८० कित्ता सेयर वाँडफाँड गरेको छ ।
फागुन २० गते निस्कासन बन्द हुने सेयरका लागि न्युनतम ५० कित्ता र अधिकतम एक हजार कित्तासम्मका लागि आवेदन दिन पाइने व्यवस्था गरिएको थियो । कम्पनीको विद्युत उत्पादन केन्द्र शंखुवासभाको जलजला गाविसमा छ ।
कम्पनीको कुल सेयरमध्ये ७० प्रतिशत प्रवद्र्धकहरुसँग छ । १० प्रतिशत सेयर प्रभावित क्षेत्रका गाविसवाशीसँग छ । बाँकी २० प्रतिशत सेयर सर्वसाधारणका लागि निस्कासन गरिएको थियो । कुल २४ करोड ३० लाख रुपैयाँ सेयर पुँजी रहेको कम्पनीको सञ्चालक समिति अध्यक्षमा शैलेन्द्र गुरागाई छन् ।
