काठमाडौं। नेपाल विद्युत प्राधिकरणको सुदूरपश्चिम प्रादेशिक कार्यालयले प्रसारण लाइन र सब स्टेसनको काम अलपत्र पार्ने ६ वटा निर्माण कम्पनीसँग ठेक्का तोड्ने भएको छ।
कार्यालयले आइतबार एक सूचना निकाल्दै काम अलपत्र पारेकाले ठेक्का तोड्न लागिएको जनाएको छ।
पटकपटक लिखितरुपमा ताकेता गर्दा पनि ठेक्का पाएका कम्पनीले प्रसारण लाइन र सब स्टेसनको काम अगाडि नबढाएकाले ठेक्का तोड्ने प्रक्रिया अगाडि बढाइएको सूचनामा उल्लेख छ।
कार्यालयले तारुपारे निर्माण सेवा, सुनिता एण्ड कविता कन्स्ट्रक्सन, भगवती कन्स्ट्रक्सन, सकुन इन्जिनियरिङ निर्माण सेवा, आर बी कन्स्ट्रक्सन र निग्लासैनी कन्स्ट्रक्सनसँगको ठेक्का तोड्न लागेको हो।
कार्यालयले यी कम्पनीलाई ठेक्का नतोड्ने कुनै कारण भएमा ७ दिनभित्र कारणसहित उपस्थिति हुन भनेको छ।
कार्यालयका अनुसार तारुपारे निर्माण सेवाले लालपुरदेखि महेन्द्रनगर र धनगढीदेखि पुनर्वाससम्म ३३ केभी प्रसारण लाइन, सुनिता एण्ड कविता कन्स्ट्रक्सनले बुडर सबस्टेसनदेखि जोगबुढा सबस्टेसनसम्म ३३ केभी लाइन, भगवती कन्स्ट्रक्सन, आर बी कन्स्ट्रक्सन र निग्लासैनी कन्स्ट्रक्सनले पर्शुराम र आलिताल नगरपालिकाका विभिन्न स्थानमा विद्युतीकरणका काम अलपत्र पारेका छन्।
यस्तै सकुन इन्जिनियरिङ निर्माण सेवाले पर्शुराम र अमरगढी नगरपालिका तथा नवदुर्गा, आलिताल र गन्यापधुरा गाउँपालिकाका विभिन्न स्थानमा विद्युतीकरणका दुई वटा ठेक्का अलपत्र पारेको छ।
