काठमाडौं। पूर्वमुख्यसचिव तीर्थमान शाक्यको निधन भएको छ।
नेपाल कानुन समाजका अध्यक्ष समेत रहेका शाक्यको क्यान्सर रोगको उपचारका क्रममा बुधबार बिहान ग्वार्कोस्थित बिएण्डबी अस्पतालमा निधन भएको हो। लोकसेवा आयोगका पूर्वअध्यक्ष शाक्य ८१ वर्षका थिए।
उनी डेढ महिनाअघि मात्र भारतको दिल्लीमा स्वास्थ्य परीक्षण गरी स्वदेश फर्किएका थिए।
नेपालको कानुनको मस्यौदा कार्यमा दख्खल प्राप्त गर्नुभएका उनी कानुन, न्याय तथा संसदीय मामिला मन्त्रालयको सचिव समेत थिए।
पूर्वसचिव गोपीनाथ मैनालीका अनुसार लोकसेवा आयोगमा रहँदा उनको नेतृत्वमा पदपूर्ति प्रणालीमा सुधारका थुप्रै काम भएका थिए।
स्व. शाक्यका दुई छोरी र दुई छोरा छन्। श्रीमतीको करिब तीन महिनाअघि मात्र निधन भएको थियो। रासस
