काठमाडौं। पाकिस्तानमा आएको बाढीले १० अर्ब डलरभन्दा बढीको क्षति पुर्याएको छ। पाकिस्तानका योजना मन्त्री अहसान इकबालले विनाशकारी बाढीले कम्तीमा १० अर्ब डलर क्षति भएको बताए।
सोमबार छुट्टै पाकिस्तानले यसका लागि अन्तर्राष्ट्रिय मुद्रा कोष (आईएमएफ) बाट १.१ अर्ब डलरको ऋण प्राप्त गरेको छ। त्यो पैसाले पाकिस्तानको ऋणमा डिफल्ट हुनबाट जोगिन मद्दत गर्ने उद्देश्य राखेको छ।
बाढी आउनुअघि पनि पाकिस्तान आर्थिक संकटबाट गुज्रिरहेको थियो र ऋणका लागि आईएमएफसँग वार्ता गरिरहेको थियो। बाढीले कम्तीमा ११ सय भन्दा धेरै मानिसले ज्यान गुमाएका छन्। साढे ३ करोड भन्दा बढी मानिसहरु यसबाट प्रत्यक्ष प्रभावित भएका छन्। यो संख्या भनेको पाकिस्तानको कुल जनसंख्याको १५ प्रतिशतभन्दा बढी हो।
इकबालले आगामी हप्ता र महिनाहरूमा देशले गम्भीर खाद्यान्न अभावको सामना गर्ने बताए। उनका अनुसार यो बाढी २०१० मा पाकिस्तानमा आएको भन्दा खराब थियो। त्यो समय पनि २ हजारभन्दा धेरै मानिसहरुले ज्यान गुमाएका थिए।
उनले धनी राष्ट्रहरूलाई पनि पाकिस्तानलाई आर्थिक रूपमा सहयोग गर्न आह्वान गरे। उनले यो जलवायु परिवर्तनको शिकार भएको र विकसित विश्वको गैरजिम्मेवार विकासको कारण भएको आरोप समेत लगाए।
खाद्यान्न अभावलाई सम्बोधन गर्न अर्थमन्त्री मिफ्ताह इस्माइलले पाकिस्तानले कट्टर प्रतिद्वन्द्वी भारतबाट तरकारी आयात गर्न विचार गर्न सक्ने बताए। सोमबार पाकिस्तानका जलवायु परिवर्तन मन्त्री शेरी रहमानले अवस्थालाई पनि जलवायु-प्रेरित मानवीय विपत्ति भनेर टिप्पणी गरेकी थिइन। 'पाकिस्तानको एक तिहाइ अहिले पानीमुनि छ। जुन हामीले विगतमा देखेका हरेक प्रकोपबाट हुने क्षतिभन्दा फरक छ,' रहमानले भनिन्।
हालैका हप्ताहरूमा जारी गरिएको आधिकारिक तथ्यांकले पाकिस्तानमा लगभग एक महिनाको आयात धान्न सक्ने मात्र विदेशी मुद्रा संचिति रहेको देखाएको छ।
