काठमाडौं। धादिङमा निर्माणाधीन हुवासिन सिमेन्ट उद्योगलाई विद्युत आपूर्ति गर्ने स्वीचिङ स्टेसन सञ्चालनमा आएको छ। मर्स्याङदी–स्यूचाटार १३२ केभी प्रसारण लाइन अन्तर्गत धादिङको सिद्धलेक गाउँपालिका–६मा निर्माण गरिएको स्वीचिङ स्टेसनलाई शुक्रबार चार्ज गरी सञ्चालनमा ल्याइएको छ।

योसँगै हुवासिन संचालनमा आउन बाटो खुलेको छ। तिहार अगाडि यो उद्योग संचालनमा आउनेछ। तनहुँस्थित तल्लो मस्र्याङदी विद्युत गृहबाट आएको प्रसारण लाइन स्वीचिङ स्टेसनमा भित्रने(लुप इन) र बाहिरिने (लुप आउट) छ।

प्रसारण लाइनलाई स्वीचिङ स्टेसनमा लुप इन गराएर हुवासिन सिमेन्टलाई विद्युत आपूर्ति दिइने छ। हुवासिन सिमेन्टले २० मेगावाट विद्युत लिने छ। नेपाल विद्युत प्राधिकरणका कार्यकारी निर्देशक कुलमान घिसिङले दसैंको वेलामा विद्युतको माग कम हुने मौका पारेर स्वीचिङ स्टेसनलाई चार्ज गर्न अनुमति दिइएको बताए।

‘अन्य समयमा मर्स्याङदी–स्यूचाटार १३२ केभी ट्रंक लाइन बन्द गर्ने सक्ने अवस्था नै थिएन। त्यसैले दशैंको वेलामा मिलाएर चार्ज गर्न दियौं र टीकाको दिन स्वीचिङ स्टेसन चार्ज भयो,’ कार्यकारी निर्देशक घिसिङले भने, ‘अब हुवासिन सिमेन्टले चाहेको दिन १३२ केभी लाइनबाट विद्युत जडान गर्न सक्ने छ।’

धादिङको बेनिघाट रोराङ गाउँपालिकामा निर्माणाधीन हुवासिन सिमेन्टले आफ्नै खर्चमा स्वीचिङ स्टेसन निर्माण गर्न गत वर्ष सुरु गरेको थियो।कम्पनीले स्वीचिङ स्टेसनबाट कारखानासम्म करिब १४ किलोमिटर प्रसारण लाइन र कारखाना परिसरभित्र १३२÷१० केभीको सबस्टेसन निर्माण गरेको छ। प्राधिकरणले स्वीचिङ स्टेसन निर्माणको सुपरीवेक्षण गरेको थियो। 

कार्यकारी निर्देशक घिसिङका अनुसार, स्वीचिङ स्टेसनबाट स्थानीय रुपमा विद्युत आपूर्तिका लागि ३३ र ११ केभीका लाइन निकालिने छन्। ‘स्वीचिङ स्टेसनको निर्माणपछि गल्छी, नौबिसे क्षेत्रमा  खुल्न लागिरहेका उद्योगहरुलाई विद्युत उपलब्ध गराउन पूर्वाधार तयार भएको छ, साथै त्यहाँबाट स्थानीय रुपमा विद्युत आपूर्ति गरिने छ’, उनले भने, ‘यसबाट त्यस क्षेत्रको विद्युत आपूर्तिसमेत विश्वसनीय हुने छ।’

उद्योगको सिभिलको काम सकियो

१६ अर्ब लगानीको हुवासिन सिमेन्ट उद्योगको पूर्वाधारको काम लगभग सकिएको छ। कम्पनीले तिहार अघि परीक्षण उत्पादनको तयारी गरेको छ।

कम्पनीका नेपाली साझेदार सुरज वैद्यले सकेसम्म तिहार अगाडिनै उत्पादन थाल्ने गरि काम अगाडि बढाइएको बताए। 'हामी सकेसम्म तिहार अगाडि र नसके तिहारपछि परीक्षण उत्पादन थाल्नेछौं,'उनले बिजमाण्डूसँग आइतबार भने, 'उद्योगको पूर्वाधारको काम लगभग सकिसकेको छ।'

 स्वीचिङ स्टेशनबाट १४ किलोमिटर टाढा उद्योग छ। उद्योगले विजुली लैजान प्रसारणलाइन समेत निर्माण गरिसकेको छ। कम्पनीले धादिङको सिद्धालेक गाउँपालिकामा ३ नम्बरको पोल बनाउने क्रममा पहिरो गयो।

पोल जोगाउन कम्पनीले सडकको ९० सेन्टिमिटर मिचिने गरी पर्खाल उठाएपछि केही विवाद भएको थियो। तर अहिले यो विवाद समेत मिलेको छ। कम्पनीले ८० करोड रुपैयाँ खर्चेर १४ किलोमिटर प्रसारणलाइन निर्माण गरेको हो।