काठमाडौं।मोफसलमा अनलाइन शेयर कारोबार गर्ने लगानीकर्ता करिब १८ प्रतिशत पुगेका छन्। नेपाल स्टक एक्सचेन्जले(नेप्से)को तथ्यांकमा १८ प्रतिशत पुगेको छ।

मुलुकभर अनलाइन शेयर कारोबार गर्ने लगानीकर्ताको संख्या ९ हजार ९ सय ७३ पुगेको छ।त्यसमध्ये मोसफलबाट अनलाइन शेयर कारोबार गर्ने लगानीकर्ताको संख्या १ हजार ७ सय ३० रहेको छ।

मोफसलमा सबैभन्दा बढी लगानीकर्ता बनेपामा छन्। बनेपामा ४ सय ६४ लगानीकर्ताले शेयर कारोबार गर्न अनलाइन सेवा लिएका छन्। भिजन सेक्युरिटिजले ४५३ लगानीकर्तालाई अनलाइन सेवा दिएको छ भने अर्को कम्पनी डाइनामिक मनी म्यानेजर्सले ११ लगानीकर्तालाई मात्रै अनलाइन सेवा उपलब्ध गराएको छ।

अनलाइन कारोबारमा बनेपापछि पोखराका लगानीकर्ताले कारोबार गरिरहेका छन्। पोखरामा ३ सय २३ लगानीकर्ता अनलाइन कारोबारमा आबद्ध छन्।

सात ब्रोकर कम्पनीले अनलाइन कारोबारमा जोडेको हो।नेपाल स्टक हाउसले सबैभन्दा बढी १ सय ३९ लगानीकर्तालाई अनलाइन सेवा दिएको छ भने पोखरामा सबैभन्दा कम कुमारी सेक्यूरिटिजले १४ लगानीकर्तालाई अनलाइन कारोबारमा आबद्ध गराएको छ।

अनलाइन शेयर कारोबारमा जनकपुर, इटहरी र हेटौडा सबैभन्दा पछि रहेका छन्। त्यहाँ क्रमशः एक,दुई र ६ लगानीकर्ताले मात्रै अनलाइन सेवा लिएको देखिएको छ। त्यहाँ एक/एक वटा मात्रै ब्रोकर कम्पनीले शाखामार्फत सेवा दिएका छन्।

मोफसलका लगानीकर्ताले अनलाइन सेवामा चासो नदिएका कारण कारोबार कम भएको अग्रवाल सेक्यूरिटिजका म्यानेजर भुबनेश्वर यादवले बताए।अग्रवाल सेक्युरुटिजले लामो समयदेखि विराटनगरमा शाखा मार्फत शेयर कारोबार गर्दै आएको छ। उनका अनुसार लगानीकर्ताले २५ प्रतिशत रकम अग्रिम भूक्तानी गर्नुपर्ने भएकाले अनलाइनमा आकर्षण कम भएको हो।

लगानीकर्ताको सहजताकालागि शेयर बिक्री गर्न अनलाइन सेवा सित्तैमा उपलब्ध गराएको उनले बताए। यसैगरी शेयर खरिद गर्न २५ प्रतिशत नगद वा बैक ग्यारेन्टी नभए आफ्नै शेयर धितो राखेर समेत सेवा दिने गरेको यादवले बताए।

२५ प्रतिशत अग्रिम भूक्तानी लिनु नपर्ने व्यवस्था गर्न सकिए कारोबारी बढ्ने यादबको दाबी छ। उनी भन्छन् 'यसका लागि कारोबार प्रणालीमै लगानीकर्ताको बैक आबद्ध गर्नुपर्छ। लगानीकर्तालाई धरौटी राख्नुपर्ने बाध्यता पर्दैन।' मोफसलमा ५० ब्रोकर कम्पनीका ३९ शाखाले सेवा दिँदै आएको छ।