काठमाडौं । नेपाल–चीन (तिब्बत) १७औं आर्थिक तथा व्यापार मेला यही वैशाख १७ गते आयोजना हुने भएको छ।
नेपाल सरकार र चीनको स्वशासित क्षेत्र तिब्बतको वाणिज्य विभागबीच सन् १९९० मा सम्पन्न दुई देशका सरकारको व्यापार प्रतिनिधिमण्डलबीच भएको सम्झौताअनुसार प्रत्येक दुई-दुई वर्षमा सो मेला हुँदै आएको छ।
नेपाल र चीनको स्वशासित क्षेत्र तिब्बतमा दुई वर्षमा आलोपालो हुने गरिआर्थिक तथा व्यापार मेला आयोजना गर्ने सम्झौता बमोजिम मेला आयोजना गर्ने गरि तयारी गरिएको व्यापार तथा निकासी प्रवर्धन केन्द्रले जनाएको छ।
दुई देशबीच दुई पक्षीय आर्थिक र व्यापारिक सम्बन्ध अझ विस्तार गर्ने मेलाको प्रमुख उद्देश्य रहेको केन्द्रले जनाएको छ। मेलामा स्वशासित क्षेत्र तिब्बत सरकारका उपाध्यक्ष लङ फुकुअनको नेतृत्वमा पाँच सदस्यीय उच्चस्तरीय प्रतिनिधिमण्डलसहित करिब १२५ व्यापारी प्रतिनिधिको सहभागिता रहनेछ।
मेलामा तिब्बतको तर्फबाट ५० प्रदर्शनी कक्ष रहने केन्द्रले जनाएको छन्। तिब्बतका स्टलहरुमा परम्परागत जडीबुटी, कृषिजन्य उत्पादन, आधुनिक कृषि औजार, चिया, विद्युतीय उपकरण, घरायशी प्रयोगका साधन, कार्पेट, पेयपदार्थ, परम्परागत हस्तकलाका सामान, परम्परागत धुप, दुई पाङ्ग्रे, तीन पाङ्ग्रे, चार पाङ्ग्रे, विद्युतीय सवारी साधन र सौन्दर्य प्रशोधनका अतिरिक्त विभिन्न व्यापारिक कम्पनीहरुले समेत भाग लिने छन्।
यसैगरी नेपालको तर्फबाट १५ प्रदर्शनी कक्ष रहने छन्। नेपाली कक्षमा जडीबुटी, कफी, चिया, हस्तकला÷काष्ठकला, धातुकला, कार्पेट, पश्मिनालगायत विभिन्न कम्पनीका उत्पादनहरु प्रदर्शन गरिनेछ।
मेलाको अवसरमा दुई पक्षबीच विभिन्न व्यवसायिक बैठकसमेत आयोजना हुनेछन्। मेला बिहान १० बजेदेखि बेलुका ६ बजेसम्म खुल्ला रहने छ। मेलामा प्रवेश निःशुल्क गरिएको छ।
