काठमाडौं। सवारी उत्पादक चिनियाँ कम्पनी बीवाइडीले विश्वमा सबैभन्दा बढी बिक्री हुने विद्युतीय सवारी उत्पादक कम्पनी एलन मस्कको टेस्लालाई पछि पार्ने भएको छ।

कम्पनीले सोमबार २०२३ को अन्तिम तीन महिनामा ५ लाख २६ हजार युनिट इभी बिक्री गरेको बताएको छ। यसमा डिसेम्बर महिना मात्र बिक्री भएको गाडीको हिस्सा ७० प्रतिशतभन्दा बढी छ।

अमेरिकामा आधारित टेस्लाले मंगलबार वाल स्ट्रिट खुल्नुअघि यसको पछिल्लो त्रैमासिक सवारी उत्पादन र डेलिभरी तथ्यांकहरू जारी गर्ने तालिका छ। एक वर्षमा बीवाइडीले ३० लाखभन्दा बढी नयाँ गाडीहरु बेचेको छ। जसमा ब्याट्रीबाट संचालन हुने सवारीसाधन र हाइब्रिडहरू समावेश छन्। कुल बिक्रीमध्ये लगभग १६ लाख गाडी ब्याट्रीबाट चल्ने गाडीहरू थिए।

साथै कम्पनीले नेपालमा पनि २०२३ मा २ हजार ८१ युनिट गाडी निर्यात गरेको छ। यो भनेको नेपालमा आयात हुने अन्य ब्रान्डको भन्दा धेरै हो।

उद्योग विश्लेषकहरूले टेस्लाले २०२३ को अन्तिम तीन महिनामा करिब ४ लाख ८३ हजार विद्युतीय सवारीसाधन बेचेको अनुमान गरेका छन्। यो वर्षको लागि लगभग १८ लाख युनिट बेच्ने लक्ष्य छ। गत जनवरीमा मस्कले यो वर्ष २० लाख गाडी बिक्री गर्ने बताएका थिए। तर यो लक्ष्य भेट्टाउन कारको मूल्य र आर्थिक मन्दीले धेरै असर गर्‍यो। साथै बीवाइडीको मूल्य टेस्लाको भन्दा धेरै फरक र सस्तो पनि छ। गाडीको मोडलहरु पनि धेरै छन्।

धेरैजसो बीवाइडी मोडेलहरूको मूल्य एक लाख युआन र २ लाख युआनको बीचमा छ। तर टेस्लाको टेक्नोलोजी-प्याक मोडेलहरूको मूल्य ३ लाख युआनभन्दा बढी छ। दुई लाख युआनभन्दा कम मूल्यका इभीहरू सेतो रंग मन पराउने उपभोक्ता माझ लोकप्रिय छन्। पैसा बचत गर्न चाहनेहरुले बीवाइडी रुचाएको सांघाईको वाइयु अटो सेवाका बिक्री प्रबन्धक टियान माओवेईले बताएका छन्।

घरेलु बजारमा बीवाइडीका इलेक्ट्रिक र प्लग-इन हाइब्रिड कारहरू बेच्न सजिलो छ किनभने तिनीहरूमा उच्च-कार्यक्षमताका ब्लेड ब्याट्रीहरू जडान गरिएका छन्। यी प्रिमियम कार निर्माताहरूले प्रयोग गर्ने जत्तिकै राम्रो मानिन्छन्। यी दुवै ब्रान्डका गाडीहरु नेपालमा उपलब्ध छन्। यसमा नेपाली बजारमा पनि टेस्ला लक्जरियस तथा प्रिमियम सेग्मेन्टमा पर्ने भएकाले गाडीको मूल्य महँगो छ। यो ब्रान्डको गाडीको मूल्य नेपालमा एक करोडदेखि २ करोडसम्म पर्ने गरेका छन्।

तर बीवाइडीको भने ४० लाखदेखि ६६ लाख रुपैयाँ पर्ने मोडलका गाडीहरु मात्र नेपालमा उपलब्ध छन्। नेपालमा पनि टेस्लाको भन्दा बीवाइडीको बजार धेरै ठूलो छ।

दुई डलर अर्बपतिको लगानी रहेको अटो कम्पनीहरु बीवाइडी र टेस्लाबीच सन् २०२२ मा पनि कडा प्रतिस्पर्धा देखिएको थियो। डलर अर्बपति वारेन बफेटको लगानी रहेको बीवाइडी सन् २०२२ मा टेस्लालाई उछिन्दै विद्युतीय सवारीको मार्केट लिडर बन्न सफल भएको थियो। जसमा टेस्लाले गत वर्ष १३ लाख युनिट कार मात्र बिक्री गरेको थियो। बीवाइडीले सन् २०२२ मा १८ लाख युनिट विद्युतीय गाडी बिक्री गरेको थियो। यो भनेको टेस्लाको भन्दा ५ लाख युनिट बढी थियो। विश्वका टप यी दुई विद्युतीय गाडी निर्माता टेस्ला र बीवाइडीले सन् २०२२ मा मात्र ३१ लाख युनिट कार बिक्री गरेका थिए।

जसमा टेस्लाले इभी मात्र बिक्री गर्छ भने बीवाइडीले हाइब्रिड पनि बिक्री गर्छ। त्यसैले इभी मात्र बिक्री अहिले पनि बीवाइडीको २०२३ मा १६ लाख युनिट मात्र छ। तर टेस्लाले भने १८ लाख युनिट बिक्री गरेको अनुमान गरिएको छ। यसले गर्दा टेस्लालाई उछिन्ने दाउमा बीवाइडी छ। टेस्ला अझै प्रिमियम इभी सेग्मेन्टमा लिडर नै छ।

बीवाइडीका प्रमुख कार्यकारी वाङ चुआनफुले सन् १९९५ मा सेन्जेनमा प्लान्ट राखेका थिए। कम्पनीले स्मार्टफोन, ल्यापटप र अन्य इलेक्ट्रोनिक्समा प्रयोग हुने रिचार्जेबल ब्याट्रीहरूको निर्माताको रूपमा आफ्नो नाम बनायो। जसले जापानी कम्पनीसँग प्रतिस्पर्धा गर्‍यो।

यसले सन् २००२ मा स्टक बजारमा आफ्नो सेयर बेच्न थाल्यो र किन्चुआन अटोमोबाइल कम्पनी खरिद गरेर विविधीकरण गर्‍यो। सन् २००८ देखि बीवाइडीले दिग्गज अमेरिकी लगानीकर्ता वारेन बफेटको बर्कशायर ह्याथवेलाई भित्र्यायो।

विश्लेषकहरूका अनुसार बीवाइडीले मूल व्यवसाय ब्याट्रीहरूमा यसको वृद्धिको ठूलो हिस्सा ओगटेको छ। जुन इभीको सबैभन्दा महँगो भागहरू हुन्। ब्याट्री बीवाइडी आफैंले निर्माण गर्ने भएकाले पनि यसलाई इभी गाडी उत्पादन गर्न अरु कम्पनीको भन्दा कम लागत लाग्छ। जसले गर्दा गाडीहरु अरुको तुलनामा सस्तो मूल्यमा बजारमा बिक्री गर्न सहजता कायम भएको छ।

बीवाइडीमा धेरै प्रतिस्पर्धीहरू ब्याट्रीहरूको लागि तेस्रो-पक्ष निर्माताहरूमा भर पर्छन्। तर बीवाइडीले आफैंले उत्पादन गर्ने भएकाले त्यसको फाइदा पनि लिइरहेको छ।