काठमाडौं। सेयर बजारमा ठूला संस्थागत लगानीकर्ताको रुपमा रहेका सामूहिक लगानी कोष (म्यचुअल फण्ड) नयाँ उपकरणको खोजीमा लागेका छन्।

सेयर बजारबाट आम्दानी गर्न नसकेपछि तथा मुद्दती निक्षेपको ब्याजदर ओरालो लागेका कारण म्यचुअल फण्डहरु नयाँ उपकरणको खोजीमा लागेका हुन्।

सेयर बजारमा म्यचुअल फण्डको लगानी ४० अर्ब ४५ करोड रुपैयाँ पुगेको छ। वित्तीय विवरण सार्वजनिक गरेका बन्द र खुलामुखी ४३ वटा म्युचुअल फण्डले सूचीकृत कम्पनीको सेयरमा वैशाखमा १.५६ प्रतिशतले लगानी बढाएका छन्।

पछिल्लो एक महिनामा म्युचुअल फण्डले सेयर बजारमा ६२ करोड २१ लाख रुपैयाँ लगानी बढाएका हुन्। बजारमा चैत मसान्तसम्म म्युचुअल फण्डको लगानी ३९ अर्ब ८३ करोड रुपैयाँ थियो।

बजारमा २१ म्युचुअल फण्डले लगानी बढाउँदा २१ वटाले घटाएका छन्। सूचीकृत कम्पनीको सेयरमा सबैभन्दा धेरै एनआईबिएल सहभागिता फण्डको ४ अर्ब ६२ करोड रुपैयाँ लगानी छ। सेयरमा रिलायबल समृद्धि योजनाको सबैभन्दा कम ७७ लाख रुपैयाँ लगानी छ।

सानिमा फ्लेक्सी फण्डले सबैभन्दा धेरै ४ गुणाले लगानी बढाएर १५ करोड ४४ लाख रुपैयाँ पुर्‍याएको छ।

बैंकको ब्याजदर न्यून विन्दुमा आएपछि मुद्दती निक्षेपको पैसा सेयरमा लगानी गरेका म्युचुअल फण्डलाई धक्का लागेको छ। जसले गर्दा लगानी स्थिर राखेको बिक्री प्रबन्धकहरु बताउँछन्।

‘बजारमा लगानी गर्न पनि अहिले म्युचुअल फण्डहरु डराएको देखिन्छ। मुद्दतीको ब्याज घटेर निकै सस्तिएको छ। संस्थागत लगानीकर्ताहरुलाई लगानीको नयाँ उपकरण नै भएन,’ प्रभु क्यापिटलका म्युचुअल फण्ड प्रमुख सौगात पन्तले भने, ‘सेयर बजार बढंन नसकेपछि साथै मुद्दतीको ब्याजदर ओरालो लागेका कारण लगानीका लागि नयाँ क्षेत्र खोजी भइरहेको छ।’

म्युचुअल फण्डले चालु आर्थिक वर्ष चैत र वैशाखसम्म सेयर बजार र मुद्दती निक्षेपमा गरेको लगानी (रु लाखमा)

म्युचुअल फण्डको खुद सम्पत्तिको मूल्य (न्याभ)मा पनि गिरावट आएको छ। वैशाखमा २५ वटाको न्याभ घटेको छ। १७ वटाको भने बढेको छ।

सेयर बजारबाट हुने आम्दानीमा गिरावट आउँदा म्युचुअल फण्डको न्याभ घटेको हो। फागुनमा नेप्से सूचक २८९० विन्दुमा पुगेकामा अहिले २७०० मुनि छ।

म्युचुअल फण्डको रोजाइमा मुद्दती निक्षेप पर्न छोडेको छ। वैशाखसम्म २३ वटाको मुद्दतीमा लगानी शून्य छ। वैशाखमा कुनैले पनि मुद्दतीमा लगानी बढाएका छैनन्। मुद्दतीको लगानी २० वटाले स्थिर राख्दा आरबीबी म्युचुअल फण्ड -१ ले घटाएको छ।

सिद्धार्थ इन्भेष्टमेन्ट ग्रोथ स्किम-३ ले सबैभन्दा धेरै १८ करोड रुपैयाँ मुद्दतीमा लगानी गरेको छ।

म्युचुअल फण्डको बैंक मौज्दात र न्याभ

मुद्दती निक्षेपको ब्याज साधारण बचतभन्दा तल्लो विन्दुमा आएको छ। बैंकहरुले लगानी नहुँदा लागत बढ्ने देखेपछि ठूलो आकारको निक्षेप लिनै अस्वीकार गरिरहेका छन्।

वाणिज्य बैंकमा अहिले निक्षेपको ‍औसत ब्याजदर ४.४५ प्रतिशत छ। कर्जाको माग सुस्त भएर बैंकिङ प्रणालीमा लगातार तरलता थुप्रिएका कारण ब्याजदर ओरालो लाग्दै आएको छ।

पछिल्लो एक महिनामा म्युचुअल फण्डको मुद्दती निक्षेपमा लगानी १.२३ प्रतिशतले घटेको छ। म्युचुअल फण्डले मुद्दती निक्षेपमा चैतसम्म कुल १ अर्ब ६२ करोड रुपैयाँ लगानी गरेकामा वैशाखमा १ अर्ब ६१ करोड रुपैयाँमा झरेको छ।

बैंक मौज्दात ४.०६ प्रतिशतले बढाएका छन्। चैतसम्म ७ अर्ब ५८ करोड रुपैयाँ रहेको बैंक मौज्दात वैशाखमा आइपुग्दा ७ अर्ब ८९ करोड रुपैयाँ पुगेको छ।