काठमाडौं। नेपाल इन्फ्रास्ट्रक्चर्स इन्भेस्टमेन्ट फन्डले ‘मिसन शून्य उत्सर्जन’ योजनामा काम गर्नको लागि दिगोमा लगानी गर्न सम्झौता भएको छ।
दिगो एनइभी प्रालि विद्युतीय सवारीसाधनको कारोबारदेखि देशभर चार्जिङ स्टेसनसम्म, इभी फ्लिट सेवा, ब्याट्री एसेम्बलिङ, ब्याट्री डिस्पोजल र गाडी रूपान्तरणसम्मका पूर्वाधार निर्माणमा काम गरिरहेको कम्पनी हो। अहिले यो कामका लागि थप लगानी खोजिरहेको छ।
ग्लोबल इक्विटी फन्ड, प्राइम लाइफ इन्स्योरेन्स र हिमालयन एभरेस्ट इन्स्योरेन्सद्वारा प्रवर्द्धित कम्पनी हो नेपाल इन्फ्रास्ट्रक्चर्स इन्भेस्टमेन्ट फन्ड लिमिटेड। ‘मिसन शून्य उत्सर्जन’ मा मिलेर काम गर्नका लागि लगानी जुटाइदिन फन्ड र दिगोबीच शुक्रबार सम्झौता भएको हो।
एनआइआइएफबाट प्राप्त रकम कम्पनीले ‘मिसन शून्य उत्सर्जन’को लक्ष्यमा अघि बढ्न प्रयोग गरिने राजन रायमाझी दिगोका प्रबन्ध निर्देशकले बताए। उनका अनुसार सन् २०३० सम्ममा ५० प्रतिशत इन्धनका सवारीसाधनलाई प्रतिस्थापन गर्न सकिने छ।
यसका लागि जनतालाई यो नै भविष्य हो भन्ने विश्वास दिलाउन इकोसिस्टम आवश्यक रहेको उनले बताए।
‘यसले देशलाई ठूलो फाइदा पुर्याउँछ र एनआईआईएफबाट प्राप्त रकमले हामीलाई यो लक्ष्य छिटो पुग्न मद्दत गर्नेछ,’ ग्लोबल इक्विटी फन्डका प्रबन्ध निर्देशक डा. मनिष थापाले भने। नेपालमा वायु प्रदूषण संकटको विषय भएको उनले बताए।
‘खराब हावाको गुणस्तरबाट हुने स्वास्थ्य जटिलताहरूले वार्षिक रूपमा धेरैको ज्यान गुमाउँछन्। यातायात क्षेत्रले यस संकटमा महत्त्वपूर्ण भूमिका खेल्छ,’ उनले भने, ‘हामीले हरेक दिन सास फेर्ने धेरै प्रदूषणहरू विशेष गरी काठमाडौं जस्तो महानगरमा गाडीको इन्जिनबाट उत्पन्न हुन्छन्।’
दिगोले विद्युतीय सवारी साधनको कारोबार गर्छ। साथमा चार्जिङ स्टेसन विस्तार , इभी फ्लिट सेवा, ब्याट्री एसेम्बलिङ, ब्याट्री डिस्पोजल र गाडी रूपान्तरणसम्मका पूर्वाधार निर्माणमा काम गरिरहेको छ।
