वीरगंज। १८ करोड रुपैयाँको लगानीमा चीनको रुई डा कम्पनीले  वीरगंज कोरिडोरमा फाइबर उद्योग स्थापना गरेको छ । चिनियाँ उद्योगपति गु मिचाओले चीन र श्रीलंकापछि नेपालमा फाइबरको छाना उत्पादन कम्पनी बिस्तार गरेका हुन्।

वीरगंज–पथलैया औद्योगिक कोरिडोरका रामपुर टोकनीमा स्थापना भएको उद्योगले गत अगस्ट देखि उत्पादन थालेको उद्योगका प्रमुख मार्केटिङ अधिकृत दिनेश सिलवालले बताए ।

रुई डा कम्पनी प्रालिको नामले गत जुन देखि प्लान्ट सेटअप गरी अगस्ट देखि उत्पादन शुरु गएको उद्योगले हाल दैनिक ४ टन युपिभिसी जस्तापाता उत्पादन गरिरहेको  कम्पनीले जनाएको छ ।

चिनियाँ लगानीकै मासु कारखाना(हिमालयन फूड इन्टरनेशनल प्रालि)को उद्योग परिसर भित्रको एक विगाहा जग्गा भाडामा लिइ फाइबर उद्योग स्थापना भएको हो ।

शुरुमा ६ करोड लगानी गरी उत्पादन थालिएको उद्योगले एक वर्ष भित्रै लगानी थप्ने बताएको छ ।

उद्योगले हाल आंशिक रुपमा सञ्चालन भइरहेको छ । डबल फेजको उद्योग सेटअप भइसकेपछि उत्पादन थाल्दा दैनिक १८ टन जति फाइबरको छानो सामग्री उत्पादन हुने उनले बताए ।

‘चीनबाट प्रविधि तथा मेशिन भित्र्याई उत्पादन थालिएको छ, हाल ६ करोड खर्च भइसकेको छ, थप १२ करोड थपेर उत्पादन क्षमता वृद्धि गर्ने कम्पनीको योजना छ ’प्रमुख मार्केटिङ अधिकृत सिलवालले भने,‘नेपालमा यस्तो कम्पनी स्थापना भएपछि आयात भन्दा प्रति वर्गफुट ३० देखि ४० रुपैयाँ सस्तो परिरहेको छ ।’

उनले दिएको जानकारी अनुसार विदेशबाट आयात गर्दा  प्रति बर्गफूट १३५ देखि १५५ सम्म पर्ने फाइबरको जस्तापाता रुई डाले  ९३ देखि रु १०५  रुपैयाँ प्रति वर्गफूटको दरमा डिलरलाई बिक्री गरिरहेको छ ।

पोली भेनाइल क्लोराइड भन्ने कच्चा पदार्थलाई १८० डिग्री तापक्रममा पगालेर विभिन्न आकार र रंगमा यो जस्तापाता उत्पादन भइरहेको छ ।कम्पनीले हाल २० फिटे लम्बई र ४१ इन्च चौडाको साइज र तीन प्रकारको रंगमा उत्पादन गरिरहेको छ । शुरुको अवस्थामा ७ जना चिनियाँ प्राविधिक तथा २४ जना नेपालीले रोजगारी पाएका छन् ।

फाइबरको छानोबाट प्रदुषण वा केमिकल वातावारणमा नमिसिने भएकोले यसलाई इको फ्रेन्डली मानिन्छ । यो कम्तीमा २० वर्ष सम्म टिक्ने, वर्षा, असिना परेको बेला ध्वनि तथा घाम लागेको बेला तापक्रम न्यून राख्छ ।

विद्युतको कुचालक भएकोले पनि यसको माग दिनप्रतिदिन नेपालमा बढदै गएको छ । काठमाडौं र पोखरामा यसको उच्च माग रहेको व्यवसायीहरुले बताएका छन् । कर्कट जास्ता पाताको तुलनामा ७० प्रतिशत महंगो हुन्छ ।

तर २० वर्षपछि यसलाई रिसेल गर्न र पुनः प्रयोग गरी उत्पादन हुने भएकोले यसलाई बढी रुचाइएको हो ।