काठमाडौं। नेपाली यू १९ क्रिकेट टोली अफगानिस्तानसँग पराजित भएको छ। तीन खेलको युथओडीआई अन्तर्गत पहिलो खेलमा नेपाल अफगानिस्तानसँग १३० रनले पराजित भएको हो।
मुलपानी क्रिकेट मैदानमा ३०१ रनको लक्ष्य लिएर जवाफी ब्याटिङमा उत्रिएको नेपाल ४६.१ ओभरमा १७० रनमा अलआउट हुन पुग्यो।
नेपालका लागि ओपनर निरजकुमार यादवले सर्वाधिक ५३ रन बनाउँदा सन्तोष यादव र अभिषेक धामीले समान २४ रन बनाए। त्यस्तै अभिषेक तिवारीले १७ तथा कप्तान नरेन भट्टले १३ रन बनाए।
बलिङतर्फ अफगानिस्तानका वाहिदुल्लाह जाद्रन, जैलुल्ला शाहीन र मेहबुब खानले समान २ विकेट लिँदा अब्दुल अजिज र नजिफुल्लाह अमिरीले १ विकेट लिए।
त्यसअघि टस जितेर पहिला ब्याटिङमा उत्रिएको अफगानिस्तानले अफगानिस्तानले निर्धारित ५० ओभरमा ९ विकेट गुमाउँदा ३०१ रन बनाउँदै नेपालसामू बलियो चुनौती प्रस्तुत गरेको थियो।
बलियो ब्याटिङ गरेको अफगानिस्तानको पहिलो विकेट ८.२ ओभरमा गुम्यो। २४ रन बनाएका उजैरुल्लाह नियाजाइ २४ रन बनाएर विपिन शर्माको बलमा आउट भए।
दोस्रो विकेटको साझेदारी तोड्न भने नेपाललाई मुस्किल पर्यो। खालिद अमजदाइ र फैसल सिनोजादाले दोस्रो विकेटका लागि १५४ रनको साझेदारी गरे। यसक्रममा फैसल ९७ रन बनाएर सन्तोष यादवको बलमा रोशन विश्वकर्माबाट क्याचआउट हुँदा खालिद पनि यादवकै बलमा आशिष धामीबाट क्याचआउट भए।
त्यसबाहेक बर्कात इब्राहिमजाइले ३५ रन बनाए। उनलाई अभिषेक तिवारीले धामीबाट क्याचआउट गराए।
बलिङतर्फ नेपालका सन्तोष यादवले सर्वाधिक ३ विकेट लिँदा अभिषेक तिवारीले २ तथा दयानन्द मण्डल र विपिन शर्माले समान १ विकेट लिए।
सिरिजको दोस्रो खेल आइतबार हुनेछ।
