काठमाडौं। पोखरा थण्डर्स लगातार दोस्रो खेलमा पनि पराजित भएको छ। तर, यो खेल पनि विवादित बन्दै सकिएको छ।
अघिल्लो खेलमा विदेशी खेलाडीका कारण श्रम स्वीकृतिको विवादले १८ मिनेट ढिला सुरु भएको खेलमा पोखरा चितवनसँग २-० गोलले पराजित भएको थियो। बुधबार भने ललितपुर सिटी एफसीविरुद्धको खेलमा रेफ्रीको विवादास्पद निर्णयले खेल विवादित हुन पुग्यो। यद्यपि खेल भने साविक विजेता ललितपुर सिटीले ३-२ गोलअन्तरले जित्यो।
खेलको ११ औँ मिनेटमा ललितपुरले अग्रता बनायो। जोनाथन इडुआर्डोले कर्नरबाट प्रहार गरेको बल पोखराका गोलकिपर प्रिसोको खुट्टामा लाग्दै गोल भएको थियो।
४२औँ मिनेटमा आयुष घलानले पेनाल्टी क्षेत्रभित्रबाट निकालेको क्रसमा नवयुग श्रेष्ठले हेडरमार्फत गरेको शक्तिशाली प्रहार ललितपुरका गोलकिपर जेफ्रे बाल्टुसले बचाएका थिए। तर, रिबाउन्डमा आएको बललाई समीर तामाङले गोलमा परिणत गरे।
पहिलो हाफको इन्ज्युरी समयमा ललितपुरले फेरि गोल थप्यो। इमोह इजेकिएलले पोखराका गोलकिपर अघि बढिसकेको अवस्थामा पेनाल्टी क्षेत्रभित्रबाटै गोल गरे। पहिलो हाफमा ललितपुर २-१ गोलले अघि रह्यो।
खेलको ७५औँ मिनेटमा ललितपुरले तेस्रो गोल थप्यो। पेनाल्टी क्षेत्रभित्र जोनाथनले पाएको ब्याक पासमा सिधै गोलपोस्टमा प्रहार गर्दै तेस्रो गोल गरे।
यसपछि भने दशरथ रंगशाला अशान्त रह्यो। ८०औँ मिनेटमा समीर तामाङको क्रसमा नवयुग श्रेष्ठले प्रहार गरेको बललाई ललितपुरका गोलकिपर जेफ्रे बाल्टुसले गोलपोस्ट भित्रबाट तानेको देखिए पनि रेफ्रीले यो गोल दिएनन्। यसमा सुरुमा खेलाडीले रेफ्रीसँग आपत्ति जनाए पनि पछि पोखराका अफिसियल धक्कामुक्कामा उत्रिए। यसमा रेफ्रीदेखि एनएसएलको व्यवस्थापकसम्म पोखराका अफिसियलले हातपात गरे। यसमा प्रहरी पनि अघि बढेपछि खेलमा थप तनाव बढेको थियो।
इन्ज्युरी समयमा पोखराले गोल फर्काउन भने सफल भयो। यसपटक समीर तामाङकै क्रसमा जोए एडियोले गोल गरे।
जितसँगै २ खेलमा ४ अंकबनाएको ललितपुर सिटी अंकतालिकाको शीर्ष स्थानमा छ भने लगतार दुई हार ब्यहोरेको पोखरा अंकविहीन हुँदै तालिकाको पुछारमा छ।
