काठमाडौं। दुई साताअघि काठमाडौंको टोखाबाट बरामद भएको २५ करोड रुपैयाँ बराबरको विदेशी मुद्राका मालिक नारायण पौडेलविरुद्ध पक्राउ पुर्जी जारी भएको छ।
राजस्व अनुसन्धान विभागले अदालतबाट पक्राउ पुर्जी लिनुका साथै पौडेलको बैंक खाता, जग्गा जमिन लगायत सम्पत्ति रोक्का गरेको छ।
पौडेल भने प्रहरीले ट्रकसहित २५ करोड रुपैयाँ बरामद गरेदेखि नै फरार छन्। उनको मोबाइल पनि त्यही दिनदेखि अफ भएको देखिएको छ। विभागले गरेको अनुसन्धानमा ट्रक चालक कुसाङ लामाले पक्राउ गर्नुअघि पौडेलसँग फोन सम्पर्क गरेको पाइएको छ।
‘तथ्य प्रमाण र पृष्ठभूमि हेर्दा २५ करोडमा मालिक नारायण पौडेल नै भएको देखिन्छ। उनी समातिएपछि थप खुल्ने छ,’ विभागका महानिर्देशक चण्डिराज घिमिरेले भने।
विभागले इन्टेलिजेन्स र विज्ञ अनुसन्धान टोलीबाट विदेशी मुद्राको मालिक पौडेल भएको पत्ता लगाएको हो। पौडेलले प्रयोग गर्ने मोबाइल नम्बरको सीडीआर, सीसीटिभी फुटेज र डिजिटल डिभाइस विश्लेषण गर्नुका साथै उनको घर, कारोबारस्थल र गोदाम खानतलासी गरी विभिन्न प्रमाण विभागले बरामद गरेको हो।
विभागले मंगलबार पौडेलको टोखा-१० स्थित घरमा छापा मार्दा त्यहाँ एक जना कुरुवा मात्र भेटिएका थिए।
काठमाडौं उपत्यका अपराध अनुसन्धान कार्यालयको टोलीले चैत ४ गते राति काठमाडौंबाट रसुवातर्फ जाँदै गरेको ट्रक टोखा झोरबाट नियन्त्रणमा लिएको थियो।
ट्रकमा चालक बस्ने स्थान माथिको क्याबिनमा फल्स बटम बनाइ खैरो रंगको टेपले बेरेको अवस्थामा १३ लाख ७५ हजार १५० युरो र ३ लाख २० हजार ८५० अमेरिकी डलर भेटिएको थियो। प्रहरीले ट्रक चालक कुसाङलाई त्यतिबेलै पक्राउ गरेको थियो।
पौडेल सिन्धुपाल्चोकको भोटेकोशीका हुन्। सुरुमा खासाको व्यापारमा संलग्न पौडेल माओवादी शान्ति प्रक्रियामा आएपछि रक्तचन्दन तस्करीमा सामेल भए। रक्तचन्दन तस्करीबाट राम्रै रकम आर्जन गरेका पौडेल खासाको व्यापार सेलाएपछि सुन तस्करीमा लागे।
पौडेल यसअघि विभिन्न प्रकरणमा पक्राउ परिसकेका व्यापारी हुन्। केही वर्षअघि डलर काण्डमा पक्राउ परेका पौडेललाई साढे ४ वर्षअघि महाराजगञ्जस्थित आफ्नै घरमा जुवाखाल चलाएबापत प्रहरीले नियन्त्रणमा लिएको थियो। त्यतिखेर पौडेललाई रिहा गर्न तत्कालीन सभामुख अग्नि सापकोटाले दबाब दिएको प्रहरी स्रोतले बतायो।
नारायण भोटेकोशी गाउँपालिकाका पूर्वअध्यक्ष राजकुमार पौडेल र हिमालय सीमापार वाणिज्य संघका पूर्वअध्यक्ष बच्चु पौडेलका आफ्नै दाइ हुन्। राजकुमार २०७४ को निर्वाचनमा माओवादीबाट निर्वाचित भएकामा बच्चु कांग्रेस समर्थित हुन्।
उनीहरुका चार दाजुभाइमध्ये ध्रुव एमालेका जिल्लास्तरीय नेता हुन्। उनी २०५४ मा तत्कालीन फुप्लिङकट्टी गाउँपालिकाको अध्यक्ष निर्वाचित भएका थिए। ध्रुव १२ वर्षअघि रक्तचन्दन तस्करीमा पक्राउ परेका थिए भने राजकुमारविरुद्ध भोटेकोशी गाउँपालिका अध्यक्ष रहेकै बेला सुन तस्करीमा नेपाल प्रहरीको केन्द्रीय अनुसन्धान ब्युरोले मुद्दा दायर गरेको थियो।
