काठमाडौं। नेपाल सुपर लिग (एनएसएल) मा मंगलबार बुटवल लुम्बिनी एफसी र धनगढी एफसी आमनेसामने हुँदैछन्। खेल त्रिपुरेश्वरस्थित दशरथ रंगशालामा साँझ ६ बजे सुरु हुनेछ।
खेलका लागि साधारणतर्फ ३०० र भीआईपीतर्फ ६०० रुपैयाँ टिकट शुल्क तोकिएको छ। पहिलो र दोस्रो संस्करणको उपविजेता धनगढी एफसी सिजनको आफ्नो पहिलो खेलका लागि मैदान उत्रँदैछ।
यी दुई टोली हालसम्म दुई पटक आमनेसामने हुँदा दुबैले एकएक खेल जितेका छन्। अघिल्लो संस्करणमा धनगढीको प्रदर्शनमा प्रभावशाली बनेका नाइजेरियाका अफीज ओलवाले र लेवनानी फर्वाड अहमद हिजाजी यसपटक पनि टोलीमा छन्।
यी बाहेक धनगढीले मोरोक्कोका मिडफिल्डर मोहम्मद एल जाउआनीलाई तेस्रो विदेशी खेलाडीका रुपमा भित्र्याएको छ। धनगढीले चौथो विदेशी खेलाडीका रुपमा स्पेनिस गोलकिपर वालिद बिरोउलाई अनुबन्ध गरेको छ।
गोलकिपर वालिदले गत सिजन फिलिपिनो लिगको उपाधि जिताएका थिए। उनले फिलिपिनो लिगमा सर्वाधिक क्लिन-सिट राख्दै काया एफसीलाई उपाधि दिलाएका थिए।
धनगढीको प्रशिक्षकमा स्पेनका यूईएफए प्रो लाइसेन्स प्राप्त जुआन म्यानुअल मार्टिनेज छन्।
अक्सनमा धनगढीले १९ लाख ९० हजार खर्चिएर २ लाख १० हजार बचाएको थियो। क्रितिश रत्न छुन्जु मार्की खेलाडी रहेको यो टोलीमा ‘ए’ समूहबाट देवेन्द्र तामाङ, पासाङ लामा र विवेक पौडेल, ‘बी’ समूहबाट रन्दीप पौडेल, रामचन्द्र वाजी, जर्ज प्रिन्स कार्की, प्रशान्त लक्ष्यम, अशोक थापा र जियारथ शेख तथा ‘सी’ समूहबाट अमृत श्रेष्ठ, रोहन खड्गी, हरिषराज बठिट्टा र सन्तोष महत छन्।
बुटवल लुम्बिनीले पहिलो खेल झापासँग खेलिसकेको छ। त्यो खेल गोलरहित बराबरीमा सकिएको थियो। अघिल्लो खेलमा बुटवलको सम्झनलायक प्रदर्शन गोलकिपर दीप कार्कीको थियो। नियमित कप्तान एरिक बिष्टले अघिल्लो खेलमा रेड कार्ड पाएकाले आर्मब्याण्ड मनिष डाँगीले लगाउने सम्भावना छ।
बुटवलसँग ‘ए’ क्याटागोरीका एरिक र दीपका अलावा प्रदीप लामा, ‘बी’ समूहबाट निराजन धामी, सरोज तामाङ, फत्तेमान घले, विमल पाण्डे, टिकेन्द्रसिंह थापा र सन्दीप कार्की तथा ‘सी’ समूहबाट सुमन श्रेष्ठ, निङसाङ लिम्बू, खेमराज श्रेष्ठ र मनिष सेढाइ छन्।
