काठमाडौं। सेयर बजारले आइतबार शतक हानेको छ। मौद्रिक नीतिले लगानीकर्तामा उत्साह जगाएको प्रभावस्वरुप नेप्सेले शतक हानेको हो।
आइतबार दुई पटक सकारात्मक सर्किट लागेर इन्ट्रा डेेमा २७०८ विन्दुमा पुगेको नेप्से अन्तिममा ११३.४२ अंकले बढेर २६८१.५६ विन्दु कायम भएको छ।
नेप्सेले लिएको यो उचाइ २९ महिनायताकै सर्वाधिक हो। नेप्से यसअघि २०७८ फागुन ११ गते २७२० विन्दुमा थियो।
आइतबार कारोबार खुलेको एक मिनेटमै पहिलो सर्किट लागेको नेप्सेमा दोस्रो सर्किट ११ बजेर २२ मिनेटमा लागेको थियो। दोस्रो सर्किटपछि भने बजार सम्हालिएको थियो।
वाणिज्य बैंक उपसमूहको सूचक सर्वाधिक ९.८९ प्रतिशतले बढेको छ। १९ वटै वाणिज्य बैंकमा लगानीकर्ताको उच्च आकर्षण देखिएको छ।
अधिकांशको सेयर मूल्य पछिल्लो एक वर्षयताकै उच्च विन्दुमा पुगेको छ। माइक्रोफाइनान्स बाहेकका उपसमूहले बजार बढाएका हुन्।
२१ कम्पनीको सेयर मूल्यमा सकारात्मक सर्किट लागेको छ। तीमध्ये १८ वटा वाणिज्य बैंक हुन्। नेपाल इन्भेष्टमेन्ट मेगा, एसबिआई, सानिमा, एनएमबि, प्रभु, ग्लोबल आइएमई, सिटिजन, प्राइम कमर्सियल, कृषि विकास, नबिल बैंक लगायत १८ वटा बैंकको सेयर मूल्य १० प्रतिशतले बढेको हो। स्ट्यान्डर्ड चार्टर्ड बैंकको सेयर मूल्यमा भने सर्किट लागेन। यो बैंकको सेयर भाउ ८.३० प्रतिशतले बढेको छ।
त्यस्तै, उपकार लघुवित्त, हाथवे इन्भेष्टमेन्ट र निफ्राको सेयर मूल्यमा पनि सकारात्मक सर्किट लागेको छ। बजारमा १५ अर्ब ८१ करोड ५ लाख रुपैयाँको सेयर किनबेच भएको छ।
यो कारोबार रकम २०७८ भदौपछिकै सर्वाधिक हो।
कुमारी बैंकको सर्वाधिक ३६ करोड १० लाख र एनआइसी एसिया बैंकको ३४ करोड ८१ लाख रुपैयाँको सेयर किनबेच भएको छ। सबैभन्दा बढी कारोबार हुने शीर्ष १० कम्पनीको सूचीमा ६ वटा वाणिज्य बैंक छन्।
कारोबारमा आएका ३१८ मध्ये १४८ कम्पनीका लगानीकर्ताले कमाएका छन्।
८७ कम्पनीको सेयर भाउ घटेको छ। गणपति लघुवित्त वित्तीय संस्थाका लगानीकर्ताले सर्वाधिक ९.३५ प्रतिशतले गुमाएका छन्।
शुक्रबार नेपाल राष्ट्र बैंकले आर्थिक वर्ष २०८१/८२ को मौद्रिक नीतिमार्फत सेयर बजार र बैंक तथा वित्तीय संस्थाका लागि लचिलो नीति लिएसँगै त्यसको प्रभाव बजारमा देखिएको हो। राष्ट्र बैंकले लगानीकर्तालाई सेयर धितो कर्जामा यसअघि लगाइएको २० करोडको क्याप हटाएको छ।
राष्ट्र बैंकले सेयर धितो कर्जामा खुकुलो नीति लिएसँगै लगानीकर्तामा उत्साह देखिएको हो। राष्ट्र बैंकले चार वर्षअघि सेयर धितो कर्जामा क्याप लगाएको थियो।
त्यसपछि नेप्से ३२०० विन्दुबाट लगातार ओरालो लागेर १८०६ विन्दुसम्म आइपुगेको थियो। नयाँ राजनीतिक समीकरणपछि नेप्सेले लगातार उचाइ लिइरहेको छ।
राष्ट्र बैंकले कर्जाको जोखिम भार सम्बन्धी व्यवस्थामा पुनरावलोकन गरिने बताएको छ। अहिले सेयर धितो कर्जाको जोखिमभार ५० लाखभन्दा बढीको हकमा १२५ र ५० लाख रुपैयाँसम्मको हकमा शतप्रतिशत छ।
यसबाहेक राष्ट्र बैंकले बैंक तथा वित्तीय संस्थाको प्रोभिजनिङ रकम १.२० बाट १.१० प्रतिशतमा झारेको छ।
त्यस्तै, बैंक तथा वित्तीय संस्थाहरुको २०८१ असार मसान्तसम्म पाकेको ब्याज २०८१ साउन मसान्तसम्म प्राप्त भएमा त्यस्तो रकमलाई आर्थिक वर्ष २०८०र८१ मा आम्दानीमा गणना गर्न पाउने व्यवस्था गरेको छ।
प्रोभिजनिङ घट्दा बैंक तथा वित्तीय संस्थाको नाफा रकम बढ्ने भएकाले त्यसको सकारात्मक प्रभाव बजारमा परेको हो।
