काठमाडौं। चालु आर्थिक वर्ष जीवन बीमा कम्पनीले १ खर्ब १० अर्ब १६ करोड रुपैयाँ बीमा शुल्क आर्जन गरेका छन्।

नेपाल बीमा प्राधिकरणका अनुसार कम्पनीहरुले ९ महिनामा बीमा शुल्क आर्जन ५.१८ प्रतिशतले वृद्धि गरेका हुन्। कम्पनीहरुले पोहोर चैत मसान्तसम्म १ खर्ब ४ अर्ब ७३ करोड रुपैयाँ बीमा शुल्क संकलन गरेका थिए।

३ कम्पनीको व्यवसाय खुम्चिंदा ११ कम्पनीले व्यवसाय बढाएका छन्। नेपाल लाइफ इन्स्योरेन्सले सबैभन्दा धेरै २९ अर्ब ४५ करोड रुपैयाँ बीमा शुल्क आर्जन गरेको छ। कम्पनीले ८.०४ प्रतिशतले व्यवसाय वृद्धि गरेको हो।

सन नेपाल लाइफ इन्स्योरेन्सले सबैभन्दा न्यून २ अर्ब ७८ करोड रुपैयाँ बीमा शुल्क संकलन गरेको छ। कम्पनीको व्यवसाय ३.०१ प्रतिशतले घटेको छ।

राष्ट्रिय जीवन बीमा कम्पनीको बीमा शुल्क सर्वाधिक २२.९९ प्रतिशतले घटेर ५ अर्ब ४६ करोड रुपैयाँमा सीमित भएको छ।

प्रथम बीमा शुल्क २.५५ प्रतिशतले वृद्धि भएको छ। चालु वर्ष चैतसम्म कम्पनीहरुले २१ अर्ब ५४ करोड रुपैयाँ प्रथम बीमा शुल्क आर्जन गरेका छन्।

पोहोर ९ महिनामा २१ अर्ब रुपैयाँ प्रथम बीमा शुल्क संकलन भएको थियो। कम्पनीहरुले नयाँ व्यवसाय बढाए पनि पोलिसी त्याग्ने क्रम भने रोकिएको छैन।

सक्रिय बीमा लेखको संख्या २.११ प्रतिशतले घटेको छ। सक्रिय बीमा लेखको संख्या पोहोर चैतसम्म १ करोड ४१ लाख ६५ हजार रहेकोमा चालु वर्ष तेस्रो त्रैमाससम्म आइपुग्दा २ लाख ९९ हजार बीमा लेख सरेन्डर भएको छ।

जीवन बीमा कम्पनीले चालु आर्थिक वर्ष तेस्रो त्रैमाससम्म संकलन गरेको प्रिमियम (रु लाखमा)