काठमाडौं। प्रधानमन्त्री पुष्पकमल दाहाल ‘प्रचण्ड’ले लगानी सम्मेलनमा ‘विस लिष्ट’ भन्दा पनि ठोस र व्यवहारिक परियोजना प्रस्तुत गर्नुपर्ने बताएका छन्।
उनले मंगलबार लगानी बोर्डको बैठकमा कार्यान्वयन गर्न सक्ने आयोजनालाई सम्मेलनमा प्रस्तुत गर्नुपर्ने बताएका हुन्। बोर्डले वैशाख १६ र १७ गते हुने सम्मेलनमा प्रस्तुत गर्नका लागि निजी क्षेत्रका ३१ वटासहित १४८ आयोजना छानेको छ।
‘लगानी सम्मेलनमा ‘विस लिष्ट’ होइन, ठोस र व्यवहारिक परियोजना प्रस्तुत गरौं,’ प्रधानमन्त्री दाहालले भने। उनले लगानीकर्तालाई आकर्षित गर्ने गरी कानुन संशोधन गरिएको भन्दै त्यसले लगानी बढाउन सहयोग पुग्ने विश्वास व्यक्त गरे।
‘सम्मेलनअघि ऐन संशोधन गरेका छौं। त्यसले लगानी बढाउन मद्दत गर्नेछ। त्यसैले ठोस र व्यवहारिक योजना दिनुपर्छ,’ उनले भने। सरकारले सोमबार अध्यादेशमार्फत ९ वटा कानुन संशोधनका लागि राष्ट्रपतिसमक्ष सिफारिस गरेको थियो।
प्रधानमन्त्री दाहालले निजी क्षेत्रलाई विश्वासमा लिइ देशमा लगानीमैत्री वातावरण छ भन्ने सन्देश प्रवाह गर्नुपर्नेमा जोड दिए।
‘निजी क्षेत्रलाई विश्वासमा लिएर विकासको नयाँ मोडेल तयार पार्नुछ,’ उनले भने, ‘निजी क्षेत्रलाई विश्वासमा नलिएसम्म विकास हुँदैन, त्यसैले निजी क्षेत्रलाई नियन्त्रण होइन, सहजीकरण गरौं।’