भरतपुर। चितवनमा बिहीवार र शुक्रवार तापक्रम ३९ डिग्रीसम्म मापन गरियो। चर्को घामका कारण मानिसलाई घर बाहिर निस्कन कठिन छ।
बढ्दो गर्मी छल्न यहाँका स्थानीयहरु इच्छाकामना गाउँपालिका-६ जलविरेस्थित लामो झरनामा जान थालेका छन्। गर्मी बढेसँगै झरनामा आन्तरिक पर्यटकको घुइँचो लाग्न थालेको छ।
नारायणगढ-मुग्लिन सडकअन्तर्गत पर्ने जलविरेको एक सय दुई मिटरभन्दा लामा झरना नारायणगढबाट मुग्लिनतर्फ २७ किमी र मुग्लिनबाट नारायणगढतर्फ सात किमीको दूरीमा पर्छ। सडकबाट एक किमी उकालो बाटो हिँडेपछि झरनामा पुगिन्छ। हिँडेरै र गाडीबाट पनि झरनासम्म पुग्न सकिन्छ।
वीरगंजबाट आएकी शिला महतो झरनाको चिसो पानीमा रम्दै पौडी खेल्न पाउँदा आनन्द महसुस भएको बताउँछिन्। सामाजिक सञ्जालमार्फत झरना बारेमा थाहा पाएर साथीहरुसँग घुम्न आएको उनले सुनाइन्।
उनले भनिन्, ‘पहिलोपटक आएकी हुँ, यहाँको झरना देखेर मन लोभिएको छ।’
विसं २०६९ देखि लामो झरनामा पर्यटकको आगमन बढ्न थालेको हो। झरना अवलोकनका लागि चितवन, धादिङ, गोरखा, तनहुँ, काठमाडौं, नवलपरासी, नुवाकोट, गोरखा, तनहुँ, कास्की, मकवानपुर, पर्सालगायतका जिल्लाबाट पर्यटक आउँछन्।
नारायणगढ-मुग्लिन सडकखण्ड प्रयोग गर्ने लामो दूरीका सवारीसाधन पनि यहाँ रोकिएर झरना अवलोकन गर्न पुग्ने गर्छन्। गत वर्षहरु भन्दा यस वर्ष पर्यटकको आगमन बढेको लामो झरना पर्यटन विकास समितिका अध्यक्ष देवकुमार गुरुङले बताए।
‘यहाँ पौडी खेल्न र नुहाउन आउनेका सङ्ख्या बढ्दो छ’, उनले भने, ‘बिदाको दिन र शनिवार औसतमा पाँच सय र अन्य दिन करिब दुई सय पर्यटक यहाँ आउने गरेका छन्।’
झरनामा क्यानोनिङ, क्लाइम्बिङ, स्वीमिङ, स्लाइडिङ, जम्पिङ र हाइकिङका लागि पर्यटक आउने गरेको उनले बताइन्। झरना अवलोकनका लागि इच्छाकामनाका बासिन्दाले प्रतिव्यक्ति २५ रुपैयाँ र अन्य स्वदेशीले प्रतिव्यक्ति ५० रुपैयाँ प्रवेश शुल्क तिर्नुपर्छ।
विदेशीले प्रतिव्यक्ति १०० रुपैयाँ तिर्नुपर्ने व्यवस्था गरिएको छ। प्रवेश शुल्कबाट प्राप्त भएको सबै रकम इच्छाकामना गाउँपालिकाले लिने गरेको छ।
झरना पुग्ने सडक निर्माणसँगै शौचालय, चेन्जिङ रुम र तलाउ निर्माण गरिएको छ। अन्य भौतिक संरचना र झरनाको सौन्दर्यकरणका काम पनि गर्ने तयारी गरिएको छ।
‘झरनाको प्राकृतिकस्वरुप नबिग्रने गरी जिपलाइन निर्माणको तयारी गरेका छौँ’, गुरुङले भने, ‘पर्यटकीय गतिविधि बढाउने अन्य संरचना पनि निर्माण गर्ने योजनामा छौँ।’
यहाँ झरनाकै कारण होटल बढेका छन् भने व्यवसाय पनि बढेको गुरुङ बताउँछन्।
इच्छाकामना गाँउपालिकाका अध्यक्ष दानबहादुर गुरुङले जलविरे झरना पर्यटकको रोजाइको गन्तव्य बनेको बताए। उनले प्रदेश सरकारको सहयोगमा सिँढी, रेलिङ र पौडी पोखरी निर्माण गरिएको जानकारी दिए।
‘यो झरना गाउँपालिकाको आन्तरिक आयस्रोतको माध्यम बनेको छ’, उनले भने, ‘वार्षिक २५ लाख रुपैयाँसम्म आम्दानी हुने गरेको छ।’
अध्यक्ष गुरुङले यहाँ पर्यटकलाई केही समय रहने वतावरण तयार गर्ने गरी काम भइरहेको बताए। उनले कर्मचारी राखेर दैनिक झरना वरपरको सरसफाइ गरिरहेको जानकारी दिए।
आगामी आर्थिक वर्षमा नजिकै रहेको गाउँहरुमा पर्यटकलाई लैजाने र त्यही बाटो हुँदै इच्छाकामना मन्दिर पुर्याउने योजना गाउँपालिकाले बनाएको अध्यक्ष गुरुङले बताए। रासस
