काठमाडौं। सुदूरपश्चिमको विद्युत् प्रवाह चुस्त बनाउन २० अर्ब रुपैयाँ लागतको बझाङ-बनलेक (पश्चिम सेती) ४०० केभी प्रसारण लाइन निर्माणका लागि लाइसेन्स माग गर्दै राष्ट्रिय प्रसारण ग्रिड कम्पनी (आरपीजीसीएल)ले विद्युत विकास विभागमा आवेदन दिएको छ।
बझाङको जयपृथ्वी नगरपालिका-१ स्थित चैनपुर सबस्टेसनदेखि डोटीको शिखर नगरपालिका-१० स्थित बनलेक सबस्टेसनसम्मको ६० किलोमिटर खण्ड निर्माणका लागि लाइसेन्स माग्दै आरपीजीसीएलले आवेदन दिएको हो।
डबल सर्किट प्रसारण लाइनले ४००,००० भोल्ट र २५०० मेगावाट विद्युत प्रवाह गर्नेछ। प्रसारण लाइन आयोजना अन्तर्गत ४००/१३२ केभी, १६० एमभीए क्षमताको चैनपुर सबस्टेसन तथा ४००/१३२ केभी, ३१५ एमभीए क्षमताको बनलेक (पश्चिम सेती) सबस्टेसन समेत निर्माण गरिनेछ।
यसका लागि जग्गा प्राप्ति र आयोजनाको सर्वेको काम सम्पन्न भइसकेको छ।
प्रसारण लाइनमा १४३ वटा डबल सर्किट टावर निर्माण गरिने छन्। टावरको अधिकतम उचाइ ६१ मिटर तथा टावरबीचको औसत दूरी ४०८.९९ मिटर र न्यूनतम दूरी १२७.७९ मिटरसम्म हुनेछ।
प्रसारण लाइन निर्माणका लागि कूल २९५.४२३ हेक्टर जमिन आवश्यक पर्नेछ। जसमध्ये टावर निर्माणका लागि ३०.४१५ हेक्टर र विद्युत मार्गको क्षेत्राधिकार (राइट अफ वे) अन्तर्गत २६५.००८ हेक्टर जग्गा आयोजनालाई आवश्यक पर्नेछ।
सबस्टेसन निर्माणका लागि कुल २१.४१५ हेक्टर जग्गामध्ये ७.०४३ हेक्टर बनलेक सबस्टेसनका लागि र १४.३७२ हेक्टर चैनपुर सबस्टेसनका लागि आवश्यक पर्नेछ।
प्रसारण लाइनको क्षेत्राधिकार (आओडब्लू) विद्युत नियमावली २०५० मा तोकिए बमोजिम न्यूनतम दूरीमा नघटाई प्राविधिक दृष्टिकोणबाट ४६ मिटर (मध्य विन्दुबाट २३/२३ मिटर दायाँबायाँ) कायम गरिनेछ।
कम्पनीको आवेदन पछि विभागले आयोजनाबाट पर्न सक्ने असरबारे जानकारी गराउन ३५ दिने सार्वजनिक सूचना जारी गरेको छ।
६ कम्पनीले गर्दैछन् लगानी
यो प्रसारण लाइन सार्वजनिक-निजी साझेदारी अन्तर्गत निर्माण गर्न ‘पश्चिम वेस्ट-सेती ट्रान्समिसन लिमिटेड’ कम्पनी खडा गरिसकिएको छ।
२० अर्ब रुपैयाँ लागत अनुमान गरिएको प्रसारण लाइन ३० प्रतिशत पुँजी र ७० प्रतिशत ऋण जुटाएर निर्माण गरिनेछ।
प्रसारण लाइन निर्माणका लागि कम्पनीमा सरकारको ५१ प्रतिशतमध्ये राष्ट्रिय प्रसारण ग्रिड कम्पनी (आरपीजीसीएल)ले २६ प्रतिशत तथा नेपाल विद्युत प्राधिकरणका सहायक कम्पनी चिलिमे जलविद्युत र चैनपुर सेतीले १२.५/१२.५ प्रतिशत सेयर लगानी रहनेछ।
निजी क्षेत्रका तर्फबाट ३ वटा कम्पनीको ४९ प्रतिशत लगानी रहनेछ। समृद्धि इनर्जी लिमिटेडले सबैभन्दा धेरै २५.१ प्रतिशत तथा ङादी ग्रुपपावर लिमिटेडले ७ प्रतिशत र सिउरी न्यादी पावर लिमिटेडले ६.९ प्रतिशत लगानी गर्नेछन्।
प्रसारणलाइन ५ वर्षमा बनाउने भनिएको छ।
यो प्रसारण लाइनमार्फत ७५० मेगावाटको पश्चिम सेती हाइड्रोपावर, ४५० मेगावाटको सेती नदी-६ हाइड्रोपावर र १७० मेगावाटको अपर सेती हाइड्रोपावरबाट उत्पादन हुने बिजुली राष्ट्रिय प्रसारणमा जोडिनेछ।
