काठमाडौं। सुनमा उच्च मूल्यको कीर्तिमान दिनदिनै तोडिन थालेको छ। बिहिबार कायम भएको रेकर्ड भोलिपल्टै तोडिएको हो।
दसैं बिदापछि लगातार उकालो लागेको सुनको भाउ शुक्रबार प्रति तोला २ हजार रुपैयाँ बढेर नयाँ उचाइमा पुगेको छ।
नेपाल सुनचाँदी व्यवसायी महासंघले सुनको मूल्य प्रति तोला १ लाख ६४ हजार ४०० रुपैयाँ निर्धारण भएको जनाएको छ। दसैं बिदा सकिएपछि असोज २९ यता सुनको भाउ लगातार बढिरहेको छ।
दसैं बिदाअघि असोज २३ गते प्रति तोला १ लाख ५९ हजार १०० रुपैयाँ रहेको सुनको भाउ २९ गतेयता चार दिनमा ५ हजा ३०० रुपैयाँ बढिसकेको छ। बिहीबार तोलामा ६०० रुपैयाँ वृद्धि भएको थियो।
चाँदीको भाउ पनि लगातार उकालो लागिरहेको छ। चाँदीको मूल्य ३० रुपैयाँ बढेर प्रति तोला १ हजार ९८० रुपैयाँ पुगेको छ।
अन्तर्राष्ट्रिय बजारमा भाउ बढेका कारण नेपालमा पनि सुनचाँदी महँगिन पुगेको हो। बिहीबार प्रति औंस २६७९.५१ डलर रहेको सुनको शुक्रबार २७०९.९५ र चाँदीको भाउ ३१.६१ डलरबाट ३२.०२ डलर पुगेको छ।
