काठमाडौं। सेयर बजार ओरालो लागेर अधिकांश लगानीकर्ता तनावमा रहँदा सामूहिक लगानी कोष (म्युचुअल फण्ड)ले भने लगानी बढाएका छन्।

म्युचुअल फण्डले पछिल्लो १ महिनामा १ अर्ब १ करोड रुपैयाँ लगानी बढाएका हुन्। चालु आर्थिक वर्ष २०८३/८४ साउन मसान्तसम्म बजारमा म्युचुअल फण्डको लगानी लगानी ६० अर्ब १० करोड २६ लाख रुपैयाँ पुगेको छ। यो रकम असार मसान्तसम्मको तुलनामा १.७२ प्रतिशत धेरै हो।

म्युचुअल फण्डले गत असारसम्म ५९ अर्ब ८ करोड रुपैयाँ सेयर बजारमा लगानी गरेका थिए।

बैंकहरुमा तरलता थुप्रिएपछि लगातार तीन वर्षदेखि ब्याजदर घटिरहेको छ। ऋणकै ब्याजदर ६ प्रतिशतमा आउँदा निक्षेपको ब्याजदर २.७५ प्रतिशतमा सीमित छ।

बैंकमा राखेको पैसाले लागतसमेत धान्न नसक्ने देखिएपछि संस्थागत लगानीकर्ताको रुपमा रहेका म्युचुअल फण्डले बजारमा लगानी बढाएका हुन्। वित्तीय विवरण सार्वजनिक गरेका खुला र बन्दमुखी ५० वटा म्युचुअल फण्ड मध्ये ३१ वटाले साउनमा सेयर बजारमा लगानी बढाएका छन्।

बजारमा एनआइबिएल सहभागिता फण्डको लगानी सबैभन्दा धेरै ८ अर्ब ९० करोड रुपैयाँ पुगेको छ। साउनमा सबैभन्दा धेरै सानिमा इक्विटी फण्ड-२ ले १०६.९७ प्रतिशतले लगानी बढाएको छ। सेयर बजारमा सानिमा इक्विटी फण्ड-२ ले आफ्नो लगानी १० करोड ४५ लाख रुपैयाँ पुर्‍याएको छ।

१९ वटा फण्डले भने बजारमा लगानी घटाएका छन्। एनएमबि फिप्टीले सबैभन्दा धेरै ५०.६८ प्रतिशतले लगानी घटाएको छ। असारसम्म सेयर बजारमा एनएमबि फिप्टीले ७० करोड ४१ लाख रुपैयाँ लगानी गरेकामा साउनमा आइपुग्दा ३४ करोड ७२ लाख रुपैयाँमा सीमित गरेको छ।

सूचीकृत कम्पनीको सेयरमा म्युचुअल फण्डको लगानी रकम

ब्याजदर घटेका कारण अधिकांश म्युचुअल फण्डले मुद्दती निक्षेपमा लगानी शून्य बनाएका छन्। मुद्दतीमा राखेको रकम झिकेर म्युचुअल फण्डले सेयर बजारमा लगानी बढाएको विवरणले देखाएको छ।

म्युचुअल फण्डले बजार लगातार ओरालो लाग्दा समेत सेयरमा लगानी बढाइरहेका हुन्। बजार अहिले २५४२ अंकमा आएको छ। साउनमा २७३४ विन्दुमा पुगेको नेप्से परिसूचक फेरि ओरालो लागिरहेको छ।

म्युचुअल फण्ड व्यवस्थापक मर्चेन्ट बैंकरहरुका अनुसार लगानीको नयाँ ठाउँ नभएपछि सेयर बजारमा लगानी बढाइएको हो। संस्थागत लगानीकर्ताका रुपमा हरेका म्युचुअल फण्डले लगानी बढाए पनि बजार भने बढ्न सकेको छैन।

चैत दोस्रो साता राष्ट्रिय स्वतन्त्र पार्टीका वरिष्ठ नेता बालेन्द्र शाहको नेतृत्वमा सरकार बनेपछि उद्योगी व्यवसायीमाथि भएको धरपकडले निजी क्षेत्र त्रसित बनेका कारण सेयर बजार निरन्तर ओरालो लागिरहेको हो।

म्युचुअल फण्डले बैंकमा मौज्दात पनि बढाएका छन्। मौज्दात रकम साउनसम्म १२ अर्ब ९२ करोड रुपैयाँ पुगेको छ। यो रकम अघिल्लो महिनाको तुलनामा ९ प्रतिशत धेरै हो। म्युचुअल फण्डको असार मसान्तसम्म बैंक मौज्दात ११ अर्ब ८३ करोड रुपैयाँ थियो।

एनआइबिएल सहभागिता फण्डको बैंक मौज्दात सबैभन्दा धेरै १ अर्ब ३९ करोड रुपैयाँ छ। प्रभु स्मार्ट फण्डले बैंक मौज्दात सबैभन्दा धेरै ६४७ प्रतिशतले वृद्धि गरेर ४८ लाखबाट ३ करोड ६१ लाख रुपैयाँ पुर्‍याएको छ। ३० वटा म्युचुअल फण्डले बैंक मौज्दात बढाउँदा १९ वटाले भने घटाएका छन्।

साउनमा ३४ वटा म्युचुअल फण्डको सम्पत्तिको मूल्य बढेको छ। १६ वटाको भने घटेको छ। न्याभ प्रभु स्मार्ट फण्डको सबैभन्दा धेरै १३.९३ र प्रभु सेलेक्ट फण्डको १३.०९ रुपैयाँ छ।