काठमाडौं। विदेशी विनिमय सञ्चिति ११ महिनामा ४०.३ प्रतिशतले बढेको छ।
पोहोर असार मसान्तमा २६ खर्ब ७७ अर्ब ६८ करोड रुपैयाँ बराबर रहेको कुल विदेशी विनिमय सञ्चिति चालु वर्षको जेठ मसान्तमा आइपुग्दा बढेर ३७ खर्ब ५५ अर्ब ६४ करोड रुपैयाँ बराबर पुगेको छ।
यो सञ्चिति १९.१ महिनाको वस्तु तथा सेवाको आयात धान्न पर्याप्त रहेको नेपाल राष्ट्र बैंकले जनाएको छ।
राष्ट्र बैंकले सोमबार सार्वजनिक गरेको तथ्यांक अनुसार चालु खाता ८०२ अर्ब ६ करोड र शोधनान्तर स्थिति ९२६ अर्ब ६ करोड रुपैयाँ बचतमा छ।
पोहोर जेठ मसान्तमा शोधनान्तर स्थिति ४९१ अर्ब ४४ करोड र चालु खाता ३२१ अर्ब ७४ करोड बचतमा थियो।
