काठमाडौं । नुवाकोट सडक डिभिजनले एकैपटक १२ वटा सडकको ठेक्का तोडेको छ। बुधबार डिभिजनले सूचना जारी गर्दै १२ वटा सडक खण्डमा काम गर्ने निर्माण कम्पनीसँग ठेक्का तोडेको हो।
ठेक्का रद्द गरिएकोमा ककनी-टाडीखोला-बेलटार सडकको दुईवटा खण्डमा काम गरिरहेको बि. वाई. एन कन्स्ट्रक्सन, गुर्जे छहरे सडकका काम गरिरहेको लब कुश कन्स्ट्रक्सन, गुर्जेभन्ज्यांङ छहरे सडकमा काम गरिरहेको मनकामना कन्स्ट्रक्सन र मलेखु धादिङबेसी सडक अलपत्र पार्ने गरिबी कन्स्ट्रक्सन रहेको छ।
यसैगरी, त्रिभुवन राजमार्गको पिपलमोड-नौबिसे सडकमा काम गरेको दिपश्री इन्जीनियरिङ, गर्जे छहरे खण्डमा न्यु कामना/युनिभर्सल जेभी, बेत्रावती-धुन्चे-स्याप्रुबेसीमा बिजय निर्माण सेवा, अर्को खण्डको काम गरिरहेको श्री थुप्तेन निर्माण सेवा, त्रिभुवन राजमार्गको सुप्र्याङ नौबिसेमा एसवाईके कन्स्ट्रक्सन, नुवाकोट दरबार एप्रोच रोड बनाइरहेको चन्द्रसुर्य निर्माण सेवा र पिपलमोड नौबिसे सडक अलपत्र पार्ने भिजन कन्स्ट्रक्सनसँग पनि ठेक्का तोडिएको हो।
यी निर्माण कम्पनीहरुले ठेक्का लिएर समयमा काम नगरेपछि डिभिजनले पटकपटक ताकेता गरेको थियो। तर, त्यसरी ताकेता गर्न पनि काम गर्न बेवास्ता गरेपछि ठेक्का तोडिएको हो।
यी निर्माण कम्पनीले यो ठेक्काहरुमा भएका दायित्व समेत सरकारलाई तिर्नुपर्नेछ।
