काठमाडौं। गृहमन्त्री रमेश लेखकले राजावादीको प्रदर्शनमा देखिएको सुरक्षा चुकका विषयमा संसदीय समितिमा चैत २२ गते जवाफ दिने भएका छन्।
प्रतिनिधि सभाको राज्य व्यवस्था तथा सुशासन समितिको बुधबार बसेको बैठकमा सत्तारुढ दलकै सांसदले ४ हजार प्रदर्शनकारीलाई व्यवस्थापन गर्न नसकेको भनेर गृह प्रशासनमाथि प्रश्न उठाएपछि यस विषयमा मन्त्री लेखकले २२ गते जवाफ दिने भएका हुन्।
बैठकमा कांग्रेस र एमालेका सांसदहरुले प्रदर्शनमा सुरक्षा निकायको भूमिका निक्कै कमजोर देखिएको भन्दै यस विषयमा गृहमन्त्रीलाई बोलाएर जवाफ माग्नुपर्ने बताएका थिए।
एमाले सांसद राजेन्द्र राईले आफ्नो ठाउँबाट उठेर गृहमन्त्रीलाई तत्कालै बोलाउन सभापति रामहरि खतिवडासँग माग गरेका थिए। त्यसपछि खतिवडाले राईलाई बस्न भने। राईले भने खतिवडामाथि आफ्नो अवमूल्यन गरेको भन्दै करिब एक मिनेट चर्काचर्की गरे।
त्यसपछि खतिवडाले गृहमन्त्री लेखकलाई फोन गरेर समितिमा भएको छलफलबारे जानकारी गराउँदै समय मागेका थिए। उनकाअनुसार गृहमन्त्री लेखकले शुक्रबार जवाफ दिने बताएका छन्।
