काठमाडौं। संसद्को हिउँदे अधिवेशनमा प्रतिनिधि सभाको बैठक ११८ घण्टा २१ मिनेट चलेको छ। हिउँदे अधिवेशन माघ १८ गते सुरु भएकामा त्यसयताको ६१ दिनमा प्रतिनिधि सभाको बैठक २५ दिन बसेको हो।
यो अवधिमा प्रतिनिधि सभामा १२ वटा सरकारी र एउटा गैरसरकारी विधेयक दर्ता भएकामा ५ वटा विधेयक दुवै सदनबाट पारित भएका छन्। अध्यादेश प्रतिस्थापन विधेयक दुवै सदनबाट पारित भएका हुन्।
४ वटा विधेयक संसदीय समितिमा विचाराधीन छन्। तीन वटा विधेयक प्रतिनिधि सभामा प्रस्तुत मात्र भएको संसद् सचिवालयले जनाएको छ।
यस्तै पहिलोदेखि चौथो अधिवेशन अधिवेशनमार्फत १३ वटा विधेयकमध्ये संवैधानिक परिषद् सम्बन्धी विधेयक प्रतिनिधि सभाबाट पारित भएको छ भने जलस्रोत विधेयकको प्रतिवेदन पेस भएको छ।
यस्तै बैकिङ कसुर तथा सजाय दोस्रो संशोधन विधेयक राष्ट्रिय सभाबाट फिर्ता भइ टेबल भएको छ। ८ वटा विधेयक संसदीय समितिमा विचाराधीन रहेको संसद् सचिवालयले जनाएको छ।
राष्ट्रिय सभाबाट अघिल्ला अधिवेशनमा प्राप्त ७ मध्ये ४ वटा विधेयक प्रतिनिधि सभाले पारित गरी फिर्ता पठाएको छ भने तीन वटा विधेयक संसदीय समितिमा विचाराधीन छन्।
प्रतिनिधि सभामा सांसदहरुले उठाएका प्रश्नमा गृहमन्त्री रमेश लेखक, ऊर्जामन्त्री दीपक खड्का र भौतिक पूर्वाधार तथा यातायातमन्त्री देवेन्द्र दाहालले जवाफ दिएका छन्।
