काठमाडौं। सरकारले नेपाल स्टक एक्सचेन्ज(नेप्से)को प्रमुख कार्यकारी अधिकृत(सीइओ) नियुक्ति सम्बन्धमा एक सातामै निर्णय फेरेको छ।
मन्त्रिपरिषद् बैठकले एक साताअघिको निर्णय उल्ट्याएर चुडामणि चापागाइँलाई सीइओ नियुक्त गरेको छ।
सोमबार बसेको मन्त्रिपरिषद् बैठकले चापागाइँलाई सीइओ नियुक्त गर्ने निर्णय युवा तथा खेलकुदमन्त्री तेजुलाल चौधरीले जानकारी दिए।
अर्थमन्त्री विष्णु पौडेलले गठन गरेको समितिले सर्टलिस्टेड ५ जनाको चैत ६ गते अन्तर्वार्ता तथा कार्ययोजना प्रस्तुतिपछि नियुक्तिका लागि तीन जनाको नाम सिफारिस गरेको थियो।
मन्त्रिपरिषद्को चैत १२ गते बसेको बैठकले नारदकुमार लुईंटेललाई नियुक्त गर्ने निर्णय गरेकामा विरोध भएपछि माइन्युट गरिएको थिएन। त्यही कारण मन्त्रिपरिषद्को सोमबार साँझ बसेको बैठकले चापागाइँलाई सीइओ बनाउने निर्णय गरेको हो।
समितिले गरेको विज्ञापनमा १० जनाले आवेदन दिएकामा चापागाइँ र लुईटेलका अलावा सीडीएस एण्ड क्लियरिङका पूर्वसीइओ पूर्णप्रसाद आचार्य, नुवाकोटका बद्रीप्रसाद प्याकुरेल र हेमन्त बस्याल सर्टलिस्टमा परेका थिए।
