काठमाडौं। व्यावसायिक भुक्तानी प्रणाली कर्पोरेटपेमा आबद्ध व्यावसायिक संघसंस्थाको संख्या २० हजार नाघेको छ। नेपाल क्लियरिङ हाउस लिमिटेडले विज्ञप्ति जारी गर्दै यसले मुलुकमा व्यावसायिक भुक्तानीमा डिजिटल रुपान्तरणमा महत्त्वपूर्ण उपलब्धि हासिल गरेको जनाएको छ।
कम्पनीका अनुसार चालु आर्थिक वर्षको पहिलो ८ महिनासम्ममा कर्पोरेटपेमार्फत ७१४ अर्ब रुपैयाँभन्दा बढीको भुक्तानी कारोबार फर्छ्यौट भइसकेको छ। गत आर्थिक वर्षमा ८०० अर्ब रुपैयाँको कारोबार भएको थियो।
यसले साना तथा मझौला व्यावसायिक र विभिन्न संस्थाहरूले डिजिटल भुक्तानीका लागि यो माध्यम प्रयोग गर्ने क्रम बढिरहेको देखिएको छ।
कर्पोरेटपेको मल्टी-बैंकिङ डिजिटल पेमेन्ट तथा फाइनान्सियल सर्भिसेसले गर्दा प्रयोगकर्ताहरू उल्लेखनीय रुपमा वृद्धि भइरहेको कम्पनीले जनाएको छ। उक्त प्रणाली साना तथा मझौला व्यावसायिक संस्थाहरू, सरकारी तथा गैरसरकारी संस्थाहरू, वित्तीय संस्थाहरू लगायत विभिन्न संस्थाहरूले प्रयोग गर्दै आएका छन्।
यो प्रणालीबाट फण्ड ट्रान्स्फर, तलब भुक्तानी, भेण्डर पेमेन्ट, नेपाल सरकारको राजस्व भुक्तानी, कर्मचारी सञ्चय कोष, सामाजिक सुरक्षा कोष, नागरिक लगानी कोष, बल्क युटिलिटी भुक्तानी, क्रेडिटर सेटलमेन्ट लगायतका विभिन्न भुक्तानीहरू गर्न सकिन्छ।
साथै यस प्रणालीको एउटै प्लेटफर्ममा एकभन्दा बढी बैंक खाताहरू लिंक गरी भुक्तानीका लागि आवश्यक अपरेटिङ म्यान्डेटहरू सेट गरी फण्ड तथा रिसिभेवल व्यवस्थापन गर्न सकिन्छ। प्रणालीमा रियल टाइममा प्रति कारोबार १ करोड (सोही बैंक तथा वित्तीय संस्था) तथा २० लाख (अन्य बैंक वित्तीय संस्था) रुपैयाँसम्म तथा नन्–रियल टाइम कारोबारको हकमा २० करोड रुपैयाँसम्म कारोबार सीमा छ।
यो प्रणालीमा व्यावसायिक संघसंस्था तथा व्यक्तिले कर्पोरेटपे डट कनेक्टआइपीएस डटकमबाट कम्पनीको विवरण दाखिला गरी प्रयोगकर्ताहरूको श्रेणीबद्ध क्रम निर्धारण गरी बैंकको विवरण राखेर अनलाइन रजिष्ट्रेसन प्रक्रिया पूरा गर्न सक्छन्। त्यसपछि सम्बन्धित बैंकले रजिष्ट्रेसन अप्रुभ गरेपछि पेस गरिएको विवरण वा बैंकसँग उपलब्ध कागजातहरूको आधारमा एक्टिभेसन हुन्छ।
साथै, व्यवसायहरूले बैंकमा सम्पर्क गरी म्यानुअल इनरोलमेन्ट गर्न पनि सक्ने क्लियरिङ हाउसले जनाएको छ।
