काठमाडौं । गोरखास्थित मनकामना मन्दिर देशकै प्रमुख शक्तिपीठ मध्ये एक हो। प्यागोडा शैलीमा निर्मित मनकामना मन्दिरमा पूजा गर्न दैनिक हजारौं भक्तजन पुग्ने गर्छन्। उनीहरुकै सुविधाका लागि २५ वर्षअघि केबलकार सुरु गरिएको थियो।
शुक्रबार मनकामना केबुलकार दर्शन प्रा लि २६ औं वर्षमा प्रवेश गरेको छ। यससँगै कम्पनीले आफूलाई ‘डिजिटलाइज्ड’गर्ने तयारी सुरु गरिसकेको छ। कम्पनीले केबलकारसँगै अब त्यहाँ आउने भक्तजनलाई लक्षित गरेर अन्य सुविधा पनि थप्ने तयारी गरिरहेको छ।
कम्पनीले आउँदो एक वर्षमा आफ्नो व्यावसायीक योजना अनुसार एक अर्ब रुपैयाँ लागतमा केबुलकार सेवा पूर्ण डिजिटल प्रविधिमा रुपान्तरण गरे संचालन गर्न लागेको हो। यस्तै, केबुलकार परिसरमै हाइ इण्ड रिसोर्ट संचालनमा ल्याइँदैछ।
२५ वर्ष यता एनालग प्रविधिमार्फत सेवा दिँदै आएको केबुलकारमा प्रयोग हुने स्पेयर पार्टस् पाउन कठिनाई भएसँगै कम्पनीले डिजिटल प्रविधिमा स्तरोन्नति अगाडि बढाएको संचालक राजेश बाबु श्रेष्ठले बताए।
हाल अष्ट्रियाको डोप्पलमेयर कम्पनीको डि-कनेक्ट प्रणाली जडानको पहिलो चरणको काम सकिसकेको उनले जानकारी दिए। साथै, बाँकी दुई चरणको जडान कार्य आउँदो वर्ष २०८१ असोज सम्म पूरा गर्ने योजना रहेको उनले बताए।
‘बाँकी ३ चरणको प्रणाली जडानका लागि आवश्यक उपकरण मगाइसकेका छौं। केहि उपकरण आइपुगिसकेको छ, ‘उनले भने,’अबको चरणमा कन्ट्रोल सिस्टम, कम्युनिकेशन केबुल, केबुल लठ्ठा ‘मेन हलेज रोप’ फेरिनेछ।’
यी सबै कामहरु सकेपछि केबुलकार ‘फूलफ्लेज’ नयाँ प्रणाली अन्तर्गत संचालनमा आउने उनले बताए। केबुलकार स्तरोन्नतिका लागि करिब ४५ करोड रुपैयाँ लागत अनुमान रहेको उनले जानकारी दिए।
एक वर्षमा हाइ इण्ड रिसोर्ट बन्ने
कम्पनीले यात्रुलाई सेवा दिनेसँगै पर्यटन प्रवर्धन गर्ने उद्धेश्यले आउँदो सन् २०२४ को अन्तिम भित्रै ‘रिसोर्ट्स बाइ मनकामना’ संचालनमा ल्याउने योजना बनाएको छ।
४० कोठा रहने सो रिसोर्ट निर्माणका लागि करिब ५५ करोड रुपैयाँ लागत अनुमान गरिएको छ। रिसोर्टमा पाहुनाले स्वीमिङ्ग पुल, हेल्थ क्लब, सभा सेमिनार हल, रेष्टुरेन्ट लगायत सेवा लिन सक्ने श्रेष्ठले जानकारी दिए।
मनकामना मन्दिर परिसर र वरिपरिका क्षेत्रलाई धार्मिक साथै अन्य पर्यटकीय महत्वका साथ गन्तव्य बनाउने सो रिसोर्टले भूमिका खेल्ने उनले बताए।
केबलकार संचालनमा आएपछि मनकामनामा सुरूवाती वर्षमा २ देखि ३ लाख यात्रुहरू आउने गरेको कम्पनीले जनाएको छ। हाल वार्षिक ११ लाख यात्रु केबलकारमार्फत मन्दिर दर्शनका लागि पुग्ने गरेका छन्।
कम्पनीले यो वर्ष १२ लाख ५० हजार यात्रुलाई सेवा दिने लक्ष्य लिएको उनले बताए। श्रेष्ठले मनकामना केबुलकार २६ औं वर्षमा प्रवेश गर्दा गौरवान्वित भएका भन्दै आगामी वर्षहरूमा अरू स्तरीय सेवा दिन प्रतिबद्ध रहेको बताएका छन्।
सिएसआरमा उल्लेख्य योगदान
कम्पनीले संस्थागत सामाजिक उत्तरदायित्व ‘सिएसआर’ अन्तर्गतको सहयोग पनि गर्दै आएको छ। संस्थापक स्व. लक्ष्मण बाबु श्रेष्ठको पूण्य तिथिमा मन्दिर र त्यस वरिपरिका क्षेत्रमा विकास, स्वास्थ्य, शिक्षा क्षेत्र र विपन्न वर्गलाई पनि सहयोग गर्दै आएको कम्पनीले जनाएको छ।।
सिएसआर अन्तर्गत केवुलकार टिकट बिक्रीबाट हुने आम्दानीको कूल रकमको १-१ प्रतिशतका दरले कुल २ प्रतिशत रकम शहिद लखन गाउँपालिका गोरखा र ईच्छाकामना गाउँपालिका चितवनलाई विकास निर्माण, शिक्षा, स्वास्थ्य, संस्कृति सम्पदा जगेर्ना, विपन्न वर्गको हित तथा दैवी प्रकोपको लागि सहयोग गर्दै आएको कम्पनीले जनाएको छ।
मनकामना दर्शन प्रा. लि. वि.सं. २०५३ कार्तिक २२ गते स्थापना भएको थियो। वि.सं. २०५५ मंसिर ८ गतेबाट यसले व्यवसायिक सेवा सुरु गरेको थियो। परियोजनालाई नेपाल बैंक लिमिटेडको अगुवाईमा राष्ट्रिय वाणिज्य बैंक र तत्कालिन नेपाल बंगलादेश बैंकले ऋण लगानी गरेका थिए।
