सडक अवरुद्ध हुँदा मनाङका किसानलाई सास्ती, ‘स्याउको अर्डर आउँछ, डेलिभरी गर्न बाटो छैन’

बिजमाण्डू
२०८० भदौ ७ गते १३:३२ | Aug 24, 2023
सडक अवरुद्ध हुँदा मनाङका किसानलाई सास्ती, ‘स्याउको अर्डर आउँछ, डेलिभरी गर्न बाटो छैन’

काठमाडौं । हिमाली जिल्ला मनाङ आउने एक मात्र सडक अवरुद्ध भएको छ।

Tata
GBIME
Nepal Life

लमजुङको बेँसीसहर नगरपालिका-६ खरखरे, मर्स्याङ्दी गाउँपालिका- ४ घोप्टेभिर, रामबजार र च्याम्चेमा पहिरो खस्दा आज बिहानैदेखि सडक अवरुद्ध भएको हो।

धेरै स्थानमा पहिरो खसेकाले मनाङको मेरुदण्डको रुपमा रहेका बेँसीशहर-चामे सडक पूर्णरुपमा अवरुद्ध भएको डुम्रे-बेँसीशहर-चामे सडक आयोजना कार्यालयका सबइञ्जिनीयर सुमन अधिकारीले जानकारी दिए।

उनका अनुसार सडक निर्माण गर्दैगर्दा माथिबाट पहिरो खस्ने समस्याले बाटो खुलाउनै मुस्किल भएको छ।

अधिकारीले भने, ‘एक ठाउँमा सडक सरसफाइ गरिन्छ। अर्को स्थानमा पहिरो खसेर ट्र्याक नै बगाउने गरेको र वर्षाको समयमा भौगोलिक धरातल कमजोर रहेकाले  सडक खुलाउन नपाउँदै अवरुद्ध हुने गरेको छ।’

धरातल कमजोर भएको अवस्थामा साँगुरो बाटोमा दुई सय मिटरमाथिबाट पहिरो खस्दा सडक खुलाउन नपाउँदै अवरुद्ध हुने गरको उनले बताए।

‘मनाङ आउने एउटै मात्र सडक छ। यसमा पनि मुख्य सडकसँगै जोडिएर खोलिएका शाखा सडकका कारण समस्या हुने गरेको छ,’ उनले भने।

मुख्य सडकसँग समन्वय नगरी खोलिएका शाखा सडकबाट आउने लेदोसहितको पानीले सडकमा समस्या हुँदै आएको छ। सडक अवरुद्ध हुँदा सवारीसाधन आवतजावत तथा सामान आपूर्तिमा समस्या भएको छ। यहाँको सडक पूर्णरुपमा ठप्प हुँदा मनाङ आउने पर्यटक, पथप्रर्दशक र कर्मचारीहरू बीच बाटोमै अलपत्रमा परेका छन्।

छिनछिनमा सडक अवरुद्ध हुँदा मनाङका किसानले सास्ती भोग्नाका साथै स्याउ, आलु बिक्रीका लागि बजारसम्म पुर्‍याउनु पनि समस्या भएको स्थानीय किसान सोलबहादुर गुरुङले बताए।

उनले भने, ‘किसानलाई सबैतिरबाट सास्ती भोग्नुपर्छ। सडकका कारण बारीमा फलेका स्याउ बिक्री गर्न बजारसम्म पुर्‍याउन सास्ती भएको छ। अर्डर आएको सामान समयमा बजारसम्म पुर्‍याउनै सकिँदैन र आम्दानीभन्दा पनि सामान पुर्‍याउनमै खर्च बढी लाग्ने गरेको छ।’

उत्पादित स्याउ र आलु बिक्रीका लागि लमजुङ, पोखरा, काठमाडौं, चितवनलगायत देशका ठूला शहरबाट माग हुने गरे पनि उत्पादित वस्तु पुर्‍याउनुभन्दा बढी सामग्री ढुवानीमा खर्चनुपर्ने अवस्था मनाङका किसानले बताएका छन्। रासस