काठमाडौं। म्युचुअल फण्डहरूले सेयर बजारमा लगानी घटाएका छन्। बैंकको ब्याजदर घट्दा मुद्दती निक्षेपको रकम बजारमा लगाएका फण्डहरूले आर्थिक वर्षको अन्तिम महिनामा लगानी घटाएका हुन्।

बजारमा खुला र बन्दमुखी प्रकृतिका म्युचुअल फण्डहरूको ६५ अर्ब ४ करोड रुपैयाँ लगानी छ। जेठ मसान्तको तुलनामा यो रकम १ प्रतिशतले कम हो।

जेठ मसान्तसम्ममा स‍ेयर बजारमा फण्डहरूको लगानी ६५ अर्ब ९५ करोड रुपैयाँ पुगेको थियो। आर्थिक वर्षको अन्तिम महिनामा फण्डहरू सेयर बिक्री गरेर नाफा आर्जन गर्नुपर्ने दबाबमा रहेकाले लगानी घटेको देखिएको हो।

यो वर्ष असारमा बजारमा १० वटा फण्डहरूले लगानी बढाएका छन्। लक्ष्मी उन्नति कोषले सबैभन्दा धेरै १७ प्रतिशतले लगानी बढाएर ६७ करोड ६२ लाख रुपैयाँ पुर्‍याएको छ। ६ वटाले बजारमा लगानी स्थिर राखेका छन् भने ३८ वटा फण्डहरूले घटाएका छन्।

एनआइबिएल सहभागिता फण्डले सेयर बजारमा सबैभन्दा धेरै ८ अर्ब ७३ करोड रुपैयाँ लगानी गरेको छ। फण्डले असारमा सेयर बजारमा लगानी स्थिर राखेको छ।

म्युचुअल फण्डले सेयर बजारमा गरेको लगानी (लाखमा)

बैंकको ब्याजदर घटेर २ प्रतिशतमा आएको छ। मुद्दती निक्षेप बैंकहरूले लिन अस्वीकार गरेपछि फण्डहरूले लगानी शून्य बनाएका छन्।

मुद्दतीबाट आउने प्रतिफलले फण्डहरूको लागत समेत नउठ्ने भएपछि निक्षेप निकालेको मर्चेन्ट बैंकरहरू बताउँछन्।

बैंकको ब्याजदर पछिल्लो ३ वर्षदेखि निरन्तर घट्दै आएको छ। प्रणालीमा उच्च तरलता र न्यून कर्जा प्रवाहले लागत बढ्ने देखेपछि बैंकहरूले नै निक्षेप लिन अस्वीकार गरिरहेको संस्थागत लगानीकर्ताहरू बताउँछन्।

म्युचुअल फण्डको लगानी वित्तीय अवस्था

असारमा सेयर बजारमा लगानी घटाएका फण्डहरूले बैंक मौज्दात दोब्बरले बढाएका छन्। फण्डहरूले लगानीका लागि तयारी अवस्थामा रहन बैंक मौज्दातमा रकम राख्दै आएका छन्। असारसम्म ५८ फण्डहरूको बैंक मौज्दात १२ अर्ब ७१ करोड रुपैयाँ पुगेको छ।

यो रकम जेठसम्मको तुलनामा ४८ प्रतिशत धेरै हो। जेठसम्म फण्डहरूले ८ अर्ब ६० करोड रुपैयाँ बैंक मौज्दात राखेका थिए। २५ म्युचुअल फण्डले बैंक मौज्दात बढाएका छन्। २ वटाले स्थिर राख्दा २५ वटाले घटाएका छन्।

असारमा फण्डहरूको कुल सम्पत्तिको मूल्य घटेको छ। ४ वटाको सम्पत्तिको मूल्य बढ्दा ५४ वटाको घटेको हो।