काठमाडौं। बैंकको ब्याजदर र सेयर बजार निरन्तर घटिरहेका बेला म्युचुअल फण्डहरूले आम्दानी बढाएका छन्। वित्तीय विवरण सार्वजनिक गरेका धेरैजसो म्युचुअल फण्डको खुद सम्पत्तिको मूल्य(न्याभ) बढेको छ।

मुद्दती निक्षेपको लगानी शून्य बनाएका म्युचुअल फण्डले घटेको बजारमा पनि वित्तीय अवस्था सुधारेका हुन्। वैशाखको तुलनामा ३८ वटा म्युचुअल फण्डले न्याभ बढाएका छन्।

१९ वटाको घटेको छ भने दुईवटा फण्डको स्थिर छ। म्युचुअल फण्डलाई सेयर बजार र बैंकको मुद्दती निक्षेप लगानीका उपकरण हुन्।

लगानी रणनीति फेरेका कारण बजारमा आम्दानीमा सुधार देखिएको व्यवस्थापकहरू बताउँछन्।

‘फरक-फरक स्टकमा इन्भेष्ट गरेका कारण फण्डहरूको अवस्था केही राम्रो देखिएको हो। बजारभन्दा धेरै राम्रो गर्न सकिएको त छैन। बीचमा लोक्याप स्टक घटेका थिए। तिनीहरूबाट म्युचुअल फण्ड सिफ्ट भए,’ एक मर्चेन्ट बैंकका योजना व्यवस्थापक प्रमुखले भने, ‘यस बाहेक रिलायन्स स्पिनिङ मिल्स जस्ता केही कम्पनीको लकइन अवधि सकिएका कारण सेयर बिक्री गर्दा प्रोफिट बढेको हो।’

मुद्दती निक्षेपमा लगानीले म्युचुअल फण्डहरूलाई नै नोक्सानी छ। बैंकको ब्याजदर २.७५ प्रतिशतभन्दा तत्लो विन्दुमा आएका कारण लागत समेत उठ्ने नदेखिएपछि म्युचुअल फण्डहरूले मुद्दतीमा लगानी शून्य बनाएका छन्। मुद्दती निक्षेपको ब्याजदर घटेर प्रतिफल शून्य बनेका बेला म्युचुअल फण्डहरूले बजारमा लगानी बढाएका थिए।

सेयर बजार पनि बढ्न नसकेका कारण आम्दानीमा यसअघि धक्का लागेकामा जेठमा सुधार देखिएको हो।

खुला र बन्दमुखी म्युचुअल फण्डको वित्तीय अवस्था

खुला र बन्दमुखी ५७ म्युचुअल फण्डमध्ये ४० वटाले सेयर बजार घट्दा पनि लगानी बढाएका छन्। ती फण्डले जेठसम्म बजारमा ६८ अर्ब ३६ करोड रुपैयाँ लगानी गरेका छन्। यो रकम वैशाखसम्मको तुलनामा २.६५ प्रतिशत धेरै हो। वैशाखसम्म बजारमा म्युचुअल फण्डको लगानी ६६ अर्ब ५९ करोड रुपैयाँ थियो।

बजारमा सबैभन्दा धेरै एनआइबिएल सहभागिता फण्डले ८ अर्ब ७४ करोड रुपैयाँ लगानी गरेको छ। यो फण्डले वैशाखको तुलनामा सेयर बजारमा २.९३ प्रतिशत लगानी बढाएको हो।

गरिमा सुवर्ण योजनाले बजारमा सबैभन्दा धेरै ५९.५९ प्रतिशतले लगानी बढाएर ३८ करोड रुपैयाँ पुर्‍याएको छ।

फागुन तेस्रो साता प्रतिनिधि सभाको निर्वाचनपछि उच्च अंकले बढेको बजार चैत दोस्रो साता २९६० अंकसम्म पुगेको थियो। रास्वपाका वरिष्ठ नेता बालेन्द्र शाहको नेतृत्वमा सरकार बनेयता भने बजार निरन्तर ओरालो लागेर २६०८ अंकमा आइपुगेको छ।

बजारमा सूचक र कारोबार घटिरहेको बेलामा पनि म्युचुअल फण्डले तुलनात्मक रुपमा राम्रो गरेको मर्चेन्ट बैंकरहरू बताउँछन्।

‘हामीले हेर्दा आर्थिक वर्षको अन्त्यतिर भएकाले फण्डहरूको पर्फर्म अझै राम्रो हुनुपर्ने हो। यो सन्तोषजनक होइन। तर, बजार र अर्थतन्त्रका अरु सूचक हेर्दा म्युचुअल फण्डहरूको विवरण ठिकै देखिन्छ,’ मर्चेन्ट बैंकर्स एसोसिएसन अफ नेपालका अध्यक्ष रामेन्द्र रायमाझीले भने।

खुला र बन्दमुखी म्युचुअल फण्डको वित्तीय अवस्था

म्युचुअल फण्डले मुद्दतीमा गरेको लगानी निकालेर अहिले होल्डमा राखेका छन्। ५७ वटा म्युचुअल फण्डको बैंक मौज्दात ९ अर्ब ३ करोड रुपैयाँ छ। यो रकम वैशाखको तुलनामा ०.६७ प्रतिशत धेरै हो।