काठमाडौं। कमर्ज एण्ड ट्रष्ट बैंक गभिएपछि ग्लोबल आइएमइ बैंकको चालु आवको तेस्रो त्रैमाशमा नाफा अघिल्लो बर्षको तुलनामा शतप्रतिशत वृद्धि भएको छ । कमर्जसंगको मर्ज पुर्व बैंकको गत अवको तेस्रो त्रैमाशमा ३६ करोड नाफा रहेकोमा यस त्रैमाशमा ७२ करोड ५१ लाख रुपैयाँ नाफा पुगेको छ । मर्जर पुर्व कमर्जको गत आवको तेस्रो त्रैमाशमा भने नाफा पाँच करोड ७४ लाख रुपैयाँ रहेको थियो । तर गत आवको तेस्रो त्रैमाशमा ग्लोबल आइएमइ बैंक र कमर्ज एण्ड ट्रष्ट बैंकले कमाएको नाफा जोडेर (४१ करोड ८४ लाख) त्रैमासिक तुलना गर्दा पनि यसपटकको नाफा ७३ प्रतिशतले बढेको देखिन्छ । गत असारमा ग्लोबल आइएमइ बैंकमा गुल्मि बिकास बैंक र सोसियल डेभलपमेन्ट बैंक समेत गाभिएका थिए ।
बैंकको खुद व्याज आय २३ प्रतिशत, बिदेशी मुद्राको बिनिमयबाट भएको आम्दानी शतप्रतिशत र सञ्चालन नाफा ९८ प्रतिशतले बढेको छ । मर्जर अघिको दुई बैंकको अलगअलग खुद व्याज आयलाई जोडेर हेर्दा भने व्याज आम्दानीको वृद्धि न्युन (०.५९ प्रतिशत ) छ । गत आवको तेस्रो त्रैमाशमा ग्लोबल आइएमइको खुद व्याज आय ९९ करोड ६६ लाख थियो भने कमर्जको २२ करोड ६४ लाख रहेको थियो । चालु आवको तेस्रो त्रैमाशमा भने
.jpg)
बैंकको खुद व्याज आम्दानी एक अर्ब २३ करोड रुपैयाँ रहेको छ । त्यस्तै मर्जर अघि ग्लोबलको ३५ करोड ६२ लाख र कमर्जको नौं करोड दुई लाख सञ्चालन मुनाफा रहेको थियो । चालु आवको तेस्रो त्रैमाशमा बैंकको सञ्चालन मुनाफा ७० करोड ८२ लाख रुपैयाँ र बिदेशी मुद्राको बिनिमयबाट भएको आम्दानी नौं करोड ७५ लाख छ ।
बैंकको कर्जा ६५ प्रतिशतले बढेर ४१ अर्ब २८ करोड रुपैयाँ पुगेको छ, निक्षेप पनि ६२ प्रतिशतले बढेर ४९ अर्ब ३९ करोड रुपैयाँ पुग्यो । दुवै संस्थाको अघिल्लो पटकको कर्जा र निक्षेप जोडेर हेर्दा भने निक्षेपमा करिब ३० प्रतिशत र कर्जामा साढे २३ प्रतिशत वृद्धि भएको छ ।
बैंकको रियल स्टेटमा एक अर्ब ८४ करोड रुपैयाँ लगानी भएको छ । यो कुल कर्जाको आधारमा भने साढे चार प्रतिशत लगानी हो । बैंकको कर्जा निक्षेप अनुपात ७६.५३ रहेको छ । बैंकले अझै साढे तीन प्रतिशत रकम कर्जा लगानी गर्न सक्दछ ।
अलगअलग रहदाको तुलनामा भने बैंकको कर्मचारी र अन्य खर्च २.१२ प्रतिशतले घटेको छ । मर्जर अघि ग्लोबलको यस्तो खर्च ४८ करोड २० लाख र कमर्जको १४ करोड ५२ लाख रहेको थियो । हाल भने यस्तो खर्च ६१ करोड ३९ लाख रुपैयाँ रहेको छ ।
बैंकले यसअघि सम्भावित जोखिम बापत छुट्याएको जम्मा ३४ करोड १२ लाख रुपैयाँ फिर्ता ल्याएको छ । बैंकले यसपटक सम्भावित जोखिम बापतको व्यवस्था पनि २८ करोड ३४ लाख रुपैयाँ छुट्याएको छ । बैंकको कुल कर्जामा खराब कर्जाको हिस्सा २.८२ प्रतिशत मात्र रहेको छ भने सम्भावित जोखिम वापत ९९.२१ प्रतिशत रकम छुट्याएको छ ।
बैंकको पुजी कोष पर्याप्तता १३.०४ रहेको छ । त्यस्तै, बैंकको कोष लागत ४.६८ छ । बैंकको बेस रेट ८.२१, प्रतिसेयर आम्दानी २३.६१, मूल्य आम्दानी अनुपात १८.२६ र प्रतिसेयर नेटवर्थ १४७रुपैयाँ रहेको छ । बैंकको चुक्तापूँजी चार अर्ब १० करोड रुपैयाँ भएको छ । पुष मसान्तमा यो रकम दुई अर्ब ७८ करोड रहेको थियो । बैंकले यसपटकबाट ग्लोबल समूहको करोबार पनि उल्लेख गरेको छ । कम्पनीको ग्लोबल क्यापिटल सञ्चालनमा रहेको छ भने हालै मात्र एलिट क्यापिटल पनि ग्लोबल क्यापिटलले खरीद गरेको छ ।
