काठमाडौं। पूर्व पश्चिम राजमार्गअन्तर्गत गोरुसिङ्गे-चन्द्रौटा सडक विस्तार गर्ने ठेक्का चिनियाँ कम्पनीले पाएको छ। चाइना एमसीसी १७ ग्रुप कम्पनीले ४ अर्ब ५६ करोड ६६ लाख रुपैयाँमा ठेक्का पाएको हो।
यो ठेक्काका लागि नेपाली जेभीसहित ११ वटा निर्माण कम्पनी प्रतिस्पर्धामा थिए। बिना पुरी होल्डिङ बीएजडी, चाइना फर्स्ट हाइवे कम्पनी, कोभेक-मोतिदान जेभी, इभ्रासकन-कालिका जेभी, जेसीईजी-दिवा जेभी, लङजियान-सगुन जेभी, एससीईजीसी-एएनएस जेभी, सिम्प्लेक्स-रतौहा जेभी, एसएक्सआरबी-केएसएनएस जेभी र भीबीईपीएल-इलाइट जेभीलाई पछि पारेर चाइना एमसीसी १७ ग्रुप कम्पनीले ठेक्का पाएको हो।
कम्पनीले सम्झौता भएको अढाइ वर्षमा काम सम्पन्न गर्नुपर्नेछ। ५ वर्षसम्म मर्मत संभारको जिम्मा पनि कम्पनीको हुनेछ।
गोरुसिङ्गे-चन्द्रौटा हाल २ लेनको रहेकामा अब चार लेनमा विस्तार गरिनेछ। १९ किलोमिटर लामो सडकमा १२ वटा नयाँ पुल, ६० कलभर्ट र ११ स्थानमा पाइप कलभर्ट बनाइनेछ।
सडकका दुवै छेउमा २.५ मिटरका पैदलमार्ग हुनेछ। ठूला, मझौला र साना वन्यजन्तु आउजाउका लागि ६ वटा अन्डरपास निर्माण गरिनेछ। हुने छन्।
चन्द्रौटा चोकमा २० मिटर चौडा र ८०० मिटर लामो ‘भेइकुलर अन्डरपास’ निर्माण हुनेछ। लामो दूरीका सवारीसाधन अन्डरपास माथिबाट र स्थानीय सवारीसाधन भियूपी भित्रबाट चल्नेछन्।
