काठमाडौं। सल्यान जिल्लाको त्रिवेणी गाउँपालिका–५ सिंखमा शनिबार बिहान भएको बोलेरो गाडी दुर्घटनाका घाइतेमध्ये दुई जनाको मृत्यु भएको छ। चार जनालाई उपचारार्थ घोराही पठाइएको छ।
प्रहरीका अनुसार बिहान करिब ८ बजे भित्री सडकखण्डमा लु.प्र.०२–००१ ज ०००५ नम्बरको बोलेरो अनियन्त्रित भई दुर्घटना भएको हो। दुर्घटनामा चालक स्थानीय २४ वर्षीय भूपाल पुनसहित ६ जना घाइते भएका थिए।
घाइतेमध्ये दुई जनालाई उपचारका लागि जिल्ला अस्पताल सल्यान पठाइएको थियो। अस्पताल पुर्याएको करिब अढाइ घण्टापछि चिकित्सकले उनीहरूलाई मृत घोषणा गरेका हुन्। मृत्यु हुनेमा त्रिवेणी–६ पोखरीका ८ वर्षीय रेशम बुढाथोकी र त्रिवेणी–५ सल्लेकी १८ वर्षीया विपना बुढाथोकी छन्।
घाइतेहरु चालक पुन, २९ वर्षीय पारस बोहरा, ५० वर्षीय डिल्लीबहादुर वली र ४२ वर्षीया लालमती बुढाथोकीलाई त्रिवेणी हेल्थ केयर लुहाममा सामान्य उपचारपछि थप उपचारका लागि दाङको घोराहीस्थित राप्ती स्वास्थ्य विज्ञान प्रतिष्ठान पठाइएको छ।
दुर्घटनाको कारणबारे थप अनुसन्धान भइरहेको प्रहरीले जनाएको छ।
