चितवन। स्थानीय प्रशासनले नारायणगढ-मुग्लिन सडक सोमबार बिहानदेखि आंशिक बन्द गर्ने भएको छ।
तुइन खोलामा पहिरो रोकथामको काम गर्नुपर्ने भएकाले सवारी आवागमन आंशिक रुपमा रोक्न लागिएको हो।
चितवनका प्रमुख जिल्ला अधिकारी गणेश अर्यालयद्वारा आइतबार जारी सूचनामा भनिएको छ, ‘कृष्णभीरमा सडक मर्मत कार्य जारी रहेको समयको सदुपयोग गरी नारायणगढ-मुग्लिन सडकको तुइन खोला परियोजनाको माटो कटान कार्य गरिने छ।’
कृष्णभीरको सडक मर्मत कार्य सम्पन्न भई सवारी आवागमन सञ्चालन नहुञ्जेलसम्म यो कार्य जारी रहने सूचनामा जनाइएको छ। सवारी आंशिक रुपमा बन्द गरेर तुइन खेलामा समय-समयमा गइरहने पहिरोको माथिल्लो भागको झर्न सक्ने माटो पन्छाउने लगायतका काम गर्न लागिएको हो।
तुइन खोलामा समय-समयमा पहिरो झर्ने गर्छ। सम्भावित झर्न सक्ने भागलाई झारेर पहिरो व्यवस्थापनको काम गर्न लागिएको बताइएको छ।
सूचनाअनुसार समय-समयमा सवारीसाधन सञ्चालनका लागि खुला गरिने छ। नारायणगढ-मुग्लिन सडक बिहान ८ बजेदेखि ८:३० बजे, १०:३० बजेदेखि ११ बजे, दिउँसो १ बजेदेखि १:३० बजे, ३:५० देखि ४ बजे र साँझ ६ बजेपछिको समयमा सञ्चालन गरिनेछ। यसबाहेकको समय उक्त स्थानमा सवारी रोकेर कार्य हुने सूचनामा उल्लेख छ। रासस
